நான் கடவுள் இல்லை - எஸ்.ஏ.சி அறிவுரை

இயக்குனர் எஸ்.ஏ.சந்திரசேகர் தனது 79 -வது வயதில் 71-வது படைப்பாக உருவாக்கியிருக்கும் திரைப்படம் நான் கடவுள் இல்லை. இப்படத்தின் டீசர் மற்றும் டிரெய்லர் வெளியீட்டு விழா சென்னை பிரசாத் லேபில் நடைபெற்றது.

விழாவில் பேசிய இயக்குநர் எஸ்.ஏ.சந்திரசேகர், 'சட்டம் ஒரு இருட்டறை', 'சாட்சி' ,'நான் சிகப்பு மனிதன்' ,  'நீதிக்கு தண்டனை' போன்ற படங்கள் வரிசையில் உருவாகி இருப்பதே நான் கடவுள் இல்லை படம். இப்படத்தில் இதுவரை தமிழில் வராத விஷயத்தை நான் சொல்லியிருக்கிறேன்.

சமூகத்தால் பாதிக்கப்பட்ட ஒரு குழந்தை கடவுளுக்கு ஒரு கடிதம் எழுதுகிறது. அது கேட்கப் பட்டதா இல்லையா என்பதுதான் கதை. மேலும், இளம் இயக்குனர்களுக்கு சொல்ல விரும்புவது, எப்போதும் நல்லதைச் சொல்ல வேண்டும். தவறுகளைச் சுட்டிக்காட்ட வேண்டும்.

உண்மைகளைப் பேச வேண்டும். அதனால் பாதிப்பு வந்தாலும் பரவாயில்லை. தைரியமாகக் கருத்துகளைச் சொல்லுங்கள். சமூக சிந்தனையுடன் சமூக நோக்கத்துடன் படம் எடுக்க வேண்டும் என்று அறிவுரை கூறினார். இப்படத்தில் சமுத்திரக்கனி, இனியா, சாக்ஷி அகர்வால், குழந்தை நட்சத்திரம் டயானா, உள்ளிட்ட பலர் நடித்துள்ளனர்.