புடினின் ரகசிய காதலி, முன்னாள் மனைவி மீது புதிய தடை விதித்த இங்கிலாந்து

லண்டன் : ரஷ்ய அதிபர் புடினின் ரகசிய காதலி, முன்னாள் மனைவி மீது இங்கிலாந்து புதிய தடைகளை விதித்து உள்ளது.

உக்ரைனுக்கு எதிராக ரஷ்ய படைகள் 2 மாதங்களுக்கும் கூடுதலாக தீவிர போரில் ஈடுபட்டு வருகின்றன.  போரை நிறுத்த பல நாடுகள் தரப்பில் வலியுறுத்தப்பட்டும் அது தோல்வியில் முடிந்துள்ளது. இதனால், போரை நிறுத்தும் முயற்சியின் ஒரு பகுதியாக ரஷ்யாவுக்கு எதிராக அமெரிக்கா, இங்கிலாந்து உள்ளிட்ட நாடுகள் பொருளாதார தடைகளை விதித்து வருகின்றன.

இதுதவிர, புடினுக்கு நெருக்கடி கொடுக்கும் வகையில், இங்கிலாந்து புதிய தடைகளை விதித்து வருகிறது.  இதன்படி, ரஷ்ய அதிபர் விளாடிமிர் புடினின் ரகசிய காதலி, முன்னாள் மனைவி மீது இங்கிலாந்து புதிய தடைகளை விதித்து உள்ளது. 

இதுபற்றி இங்கிலாந்து வெளியுறவு செயலாளர் லிஸ் டிரஸ் கூறும்போது, புடினின் குடும்பம், பால்யபருவ நண்பர்கள் மற்றும் புடின் அரசாட்சியில் பலன் பெற்ற நபர்கள், பதிலுக்கு புடினின் வாழ்க்கை முறைக்கு ஆதரவாக இருந்தவர்கள் ஆகியோர் மீது புதிய தடைகள் விதிக்கப்படுகின்றன என கூறியுள்ளார்.  புடினுக்கு உதவி செய்யும் அனைவர் மீதும் இங்கிலாந்து தொடர்ந்து தடைகளை விதிக்கும் எனவும் டிரஸ் கூறியுள்ளார்.

இதன்படி, புடினின் ரகசிய காதலி என கூறப்படும் ஓய்வு பெற்ற ஒலிம்பிக் வீராங்கனையான அலினாவுக்கு எதிராக இந்த தடை விதிக்கப்படுகிறது.  இதே போன்று, ரஷ்ய கூட்டமைப்பின் அதிபர் புடினின் முன்னாள் மனைவியான லுட்மிலாவுக்கு எதிராகவும் தடை விதிக்கப்படுகிறது.  புடினின் நெருங்கிய குடும்ப உறுப்பினரான இகோர் புடின் என்பவர் மீதும் தடை விதிக்கப்படுகிறது.