அசாமில் போலீஸாருடன் மோதல்: 2 தீவிரவாதிகள் பலி

கவுகாத்தி, ஜூலை.12 - அசாம் மாநிலத்தில் போடோ தீவிரவாதிகளுக்கும், போலீஸாருக்கும் நடந்த என்கவுன்டரில் போடோ தீவிரவாதிகள்  2 பேர் உயிரிழந்தனர். போலீஸார் இருவர் காயமடைந்தனர்.  அசாமில் சோனிட்பூர் மாவட்டத்தில் தரபாரி என்ற இடத்தில் இந்த சம்பவம் நடந்தது. போடோலேண்ட்  என்ற அமைப்பின் சங்பிஜித் பிரிவைச் சேர்ந்த  தீவிரவாதிகள் 8 பேர் போலீஸார் மீது துப்பாக்கியால் சுட்டனர். இந்த என்கவுன்டரில் தீவிரவாதிகள் 2 பேர் இறந்ததாகவும், மற்றவர்கள்  தப்பி ஓடிவிட்டதாகவும், போலீஸ் அதிகாரி ஒருவரும், போலீஸ்காரர் ஒருவர் காயமடைந்ததாகவும் மாவட்ட போலீஸ் சூப்பிரண்ட் அரபிந்த கலிதா தெரிவித்தார். 

இறந்தவர்களிடமிருந்து, 2 துப்பாக்கிகள் மற்றும் ஆயுதங்களை போலீஸார் கைப்பற்றினர். இறந்தவர்களில் ஒருவர் கோல்பரா மாவட்டத்தைச் சேர்ந்த கவுரங் பசுமட்டரி என்பது தெரிய வந்தது.

 கடந்த ஆண்டு நவம்பர் மாதம் தேயிலை தோட்ட அதிபர் அடிலூர் ரஹ்மானை இவர் கொன்றார். இவரை போலீஸார் தேடி வந்ததாகவும் கூறப்படுகிறது. இறந்த மற்றொருவர் யார் என்று அடையாளம்  தெரியவில்லை.