ஆசிய சாம்பியன்ஸ் கோப்பை ஹாக்கி: ஜப்பானை வீழ்த்தியது இந்தியா

ஹூலுன்பியர் : ஆசிய சாம்பியன்ஸ் கோப்பை ஹாக்கி போட்டியில் ஜப்பானை பந்தாடி 2-வது வெற்றியை பதிவு செய்தது இந்திய அணி.

சீனாவை வீழ்த்தியது...

8-வது ஆசிய சாம்பியன்ஸ் கோப்பை ஹாக்கி போட்டி சீனாவின் ஹூலுன்பியர் நகரில் நேற்று முன்தினம் தொடங்கியது. இதில் பங்கேற்றுள்ள 6 அணிகளும் தங்களுக்குள் தலா ஒருமுறை மோத வேண்டும் லீக் சுற்று முடிவில் முதல் 4 இடங்களை பிடிக்கும் அணிகள் அரைஇறுதிக்கு முன்னேறும். தொடக்க ஆட்டத்தில் நடப்பு சாம்பியன் இந்திய அணி, சீனாவை வீழ்த்தி வெற்றியுடன் தொடங்கியது.

அடுத்தடுத்து கோல்கள்...

இதனையடுத்து இந்தியா தனது 2-வது ஆட்டத்தில் ஜப்பானுடன் நேற்று மோதியது. இதில் தொடக்கம் முதலே சிறப்பாக விளையாடிய இந்திய அணி அடுத்தடுத்து கோல்களை போட்டு தாக்கியது. முழு நேர ஆட்ட முடிவில் இந்திய அணி 5-1 என்ற கோல் கணக்கில் ஜப்பானை பந்தாடி 2-வது வெற்றியை பதிவு செய்து அசத்தியுள்ளது. இந்தியா தரப்பில் சுக்ஜீத் சிங் 2 கோல்களும், அபிஷேக், சஞ்சய் மற்றும் உத்தம் சிங் தலா 1 கோலும் அடித்தனர்.