உலக டெஸ்ட் சாம்பியன்ஷிப் இறுதி: இந்திய அணி முன்னேற செய்ய வேண்டியவை..?

சென்னை : டெஸ்ட் சாம்பியன்ஷிப் புள்ளி பட்டியலில் முதலிடத்தில் இருந்த இந்திய அணி 2-வது இடத்திற்கு சரிந்துள்ள நிலையில், உலக டெஸ்ட் சாம்பியன்ஷிப் இறுதிப்போட்டிக்கு முன்னேற இந்திய அணி என்ன செய்ய வேண்டும் என்ற விவரம் வெளியாகியுள்ளது.

ஆஸி. முதலிடம்...

இந்தியா - நியூசிலாந்து இடையிலான 3 போட்டிகள் கொண்ட டெஸ்ட் தொடர் நிறைவடைந்துள்ளது. இதில் 3 போட்டிகளிலும் தோல்வியடைந்த இந்திய அணி சில புள்ளிகளை இழந்த நிலையில் உலக டெஸ்ட் சாம்பினஷிப் புள்ளி பட்டியலில் முதலிடத்தை இழந்துள்ளது. ஆஸ்திரேலிய அணி (62.50 சதவீத புள்ளி) முதலிடத்துக்கு முன்னேறியது. இலங்கை (55.56) 3-வது இடத்தில் நீடிக்கிறது. இந்தியாவுக்கு எதிரான கடைசி ஆட்டத்தில் வெற்றி பெற்ற நியூசிலாந்து (54.55) அணி ஒரு இடம் முன்னேறி 4-வது இடத்தை பிடித்துள்ளது. தென்ஆப்பிரிக்கா (54.17) 5-வது இடத்துக்கு இறங்கியது. முதல் 5 இடங்களில் இருக்கும் அணிகள் டெஸ்ட் சாம்பியன்ஷிப் இறுதிப்போட்டிக்கான ரேசில் உள்ளன.

முன்னேற சிக்கல்... 

இதனால் நியூசிலாந்துக்கு எதிரான தொடரில் ஒயிட்வாஷ் ஆன இந்திய அணிக்கு இறுதிப்போட்டிக்கு முன்னேற சிக்கல் எழுந்துள்ளது. இருப்பினும் இந்திய அணி அடுத்ததாக நடைபெறும் ஆஸ்திரேலியாவுக்கு எதிரான பார்டர் - கவாஸ்கர் கோப்பை தொடரில் 4-1 என்ற கணக்கில் வெற்றி பெறும் பட்சத்தில் எந்த வித சிக்கலுமின்றி இறுதிப்போட்டிக்கு முன்னேறும். மாறாக இந்தியா 3-2 என்ற கணக்கில் கைப்பற்றினால் மற்ற அணிகளின் முடிவுக்காக காத்திருக்க வேண்டிவரும். ஆனால் இரண்டிற்கு மேற்பட்ட போட்டிகளில் தோல்வியை தழுவினால் நிச்சயம் வெளியேற நேரிடும் என்பது குறிப்பிடத்தக்கது.