நடிகர் சைப் அலிகான் வழக்கில் யாரையும் கைது செய்யவில்லை: மும்பை காவல்துறை விளக்கம்

மும்பை: நடிகர் சைப் அலிகான்  கத்தியால்  குத்தப்பட்ட சம்பவத்தில் இதுவரை யாரையும் கைது செய்ய வில்லை என்று மும்பை காவல் துறையினர் தெரிவித்துள்ளனர்.

மகாராஷ்டிர மாநிலம், மும்பையில் அடுக்குமாடி குடியிருப்பில் உள்ள பிரபல பாலிவுட் நடிகர் சைப் அலிகானின் வீட்டுக்குள் ஊடுருவிய மர்மநபர், அவரை கத்தியால் சரமாரியாக குத்திவிட்டு தப்பிய சம்பவம் பெரும் அதிர்ச்சியை ஏற்படுத்தியது. இத்தாக்குதலில் சைப் அலிகான்  பலத்த காயங்களுடன் மருத்துவமனையில் அனுமதிக்கப்பட்டார். சைப் அலிகானை  கத்தியால் குத்திய நபரை பிடிக்க 10 தனிப்படைகள் அமைக்கப்பட்டது.

இந்நிலையில், இவ்வழக்கில் சந்தேகிக்கும் நபர் ஒருவரை மும்பை காவல் துறையினர் கைது செய்ததாக முன்னதாக சமூக ஊடங்களில் தகவல் வெளியானது. இது குறித்து விளக்கமளித்துள்ள மும்பை காவல் துறை,  நடிகர் சைப் அலிகான் வழக்கில் அவருக்கு தொடர்பில்லை என்றும் இவ்வழக்கு தொடர்பாக இதுவரை யாரையும் கைது செய்யவில்லை என்றும்  தெரிவித்துள்ளது.

மேலும், நடிகர் சைப் அலிகான் மீதான தாக்குதலில் தொடர்புடையவராகக் கூறப்படும் குற்றவாளியை பாந்த்ரா ரயில் நிலையம் அருகே காணப்பட்டதாகவும், அவரைப் பிடிக்க தேடுதல் வேட்டை நடந்து வருவதாகவும் மும்பை காவல்துறையினர் தெரிவித்தனர்.