இளநிலை மருத்துவ படிப்பிற்கான நீட் தேர்வு மே 4-ம் தேதி நடக்கிறது : தேசிய தேர்வு முகமை அறிவிப்பு

 புதுடில்லி : இளநிலை மருத்துவ படிப்பிற்கான  நீட் தேர்வு மே 4-ல்   நடைபெறும் என்றும், அதற்கான விண்ணப்ப பதிவு துவங்கியதாகவும் தேசிய தேர்வு முகமை அறிவித்து உள்ளது. 

 எம்.பி.பி.எஸ்., மருத்துவ படிப்புகளில் சேருவதற்கான, 'நீட்' எனப்படும், தேசிய தகுதி மற்றும் நுழைவுத் தேர்வு ஆண்டுதோறும் நடத்தப்படுகிறது. மத்திய கல்வி அமைச்சகத்தின் கீழ் செயல்படும் என்.டி.ஏ., எனப்படும், தேசிய தேர்வு முகமை இந்த தேர்வுகளை நடத்துகிறது. நாட்டின் மிகப் பெரிய நுழைவுத்தேர்வாக கருதப்படும் இளநிலை நீட் தேர்வை, ஆண்டுதோறும் 20 லட்சத்திற்கும் மேற்பட்ட மாணவர்கள் எழுதி வருகின்றனர்.

இந்நிலையில், 2025ம் ஆண்டு தேர்வுக்கான விண்ணப்ப பதிவு துவங்கியதாக தேசிய தேர்வு முகமை அறிவித்து உள்ளது.

விண்ணப்ப பதிவு நேற்று துவங்கியுள்ள நிலையில், விண்ணப்பங்களை பதிவு செய்ய கடைசி நாள் மார்ச் 7 ஆகும். அன்றே தேர்வுக் கட்டணம் செலுத்த கடைசி நாள். நுழைவுச்சீட்டு மே 1-ம் தேதி வெளியிடப்படும். தேர்வு மே 4-ம் தேதி நடக்கும். தேர்வு முடிவு ஜூன் 14-ம் தேதி  வெளியிடப்படும். பொதுப்பிரிவு மாணவர்கள்  ரூ.1700-ம், பொருளாதாரத்தில் பின் தங்கியவர்கள்: ரூ.1,600-ம், எஸ்சி/எஸ்டி/3ம் பாலினத்தவர்கள்: ரூ.1000-ம், வெளிநாட்டினர் :ரூ.9,500-ம் கட்டணம் செலுத்த வேண்டும்.