சீமானும், அண்ணாமலையும் நிழலோடு யுத்தம் செய்கிறார்கள்: அமைச்சர் பதில்

சென்னை : சீமானும் அண்ணாமலையும் நிழலோடு யுத்தம் செய்கிறார்கள் என்று அமைச்சர் சேகர்பாபு கூறியுள்ளார்.

நாம் தமிழர் கட்சி ஒருங்கிணைப்பாளர் சீமானுக்கு பா.ஜ.க. மாநில தலைவர் அண்ணாமலை ஊக்கம் அளித்தது குறித்து இந்து சமய அறநிலையத்துறை அமைச்சர் பி.கே.சேகர்பாபுவிடம் செய்தியாளர்கள் கேள்வி எழுப்பினர். அப்போது அவர் கூறியதாவது:-

சீமானும் அண்ணாமலையும் நிழலோடு யுத்தம் செய்கின்றனர். நாங்கள் நிஜத்தோடு யுத்தம் செய்து கொண்டிருக்கிறோம். சீமானும் அண்ணாமலையும் செய்யும் யுத்தத்திற்கும், தி.மு.க.வின் யுத்தத்திற்கும் பல வேறுபாடுகள் உள்ளது. கோவில்களில் தமிழில் அர்ச்சனை செய்யும் அர்ச்சகர் பெயர், கைப்பேசி எண்ணுடன் விளம்பர பலகை வைக்கப்பட்டுள்ளது.

தமிழில் அர்ச்சனை செய்தால் அர்ச்சனை சீட்டு கட்டணத்தில் 60 சதவீதத்தை ஈட்டுத்தொகையாக வழங்கி வருகிறோம். திருக்கோவில்களில் சமஸ்கிருதத்தில் அர்ச்சனையை தடுக்கவில்லை. அதே நேரத்தில தமிழ் வழிபாட்டுக்கு முக்கியத்துவம் அளித்து உள்ளோம். எந்த மொழிக்கும் நாங்கள் எதிரானவர்கள் அல்ல. ஒரு மொழியை திணிக்கின்றபோதான் அதற்கு எதிர்த்து நிற்கிறோம். இவ்வாறு அவர் கூறினார்.