கோடை விடுமுறைக்கு பிறகு கல்லூரிகள் ஜூன் 16-ல் திறப்பு: கல்லூரிக் கல்வி இயக்குநரகம் தகவல்

சென்னை, கோடை விடுமுறை முடிந்து மீண்டும் கல்லூரிகள் திறப்பு குறித்து முக்கிய அறிவிப்பை கல்லூரிக் கல்வி இயக்குநரகம் வெளியிட்டுள்ளது.

தமிழ்நாட்டில் 2024-25 கல்வி-ண்டுக்கான 10, 11 மற்றும் 12-ம் வகுப்பு பொதுத் தேர்வு மார்ச் மாதம் தொடங்கி ஏப்ரல் வரை நடைபெற்றது. 1 முதல் 3-ம் வகுப்புகளுக்கு ஏப்.15 முதல் 21-ம் தேதி வரை காலையில் முழுஆண்டு தேர்வு நடைபெற்றது. மேலும் 4-ம் வகுப்பு மற்றும் 5-ம் வகுப்புகளுக்கு ஏப்.9-ம் தேதி முதல் 21-ம் தேதி வரை மதியம் தேர்வு நடைபெற்றது.

இதனைத்தொடர்ந்து தமிழ்நாட்டில் 1-ம் வகுப்பு முதல் 5-ம் வகுப்பு வரை மாணவர்களுக்கு ஏப்.22-ம் தேதியில் இருந்தும், 6-ம் வகுப்பு முதல் 9-ம் வகுப்பு வரை பயிலும் மாணவர்களுக்கு ஏப்.25-ம் தேதியில் இருந்தும் கோடை விடுமுறை தொடங்கும் என அறிவிக்கப்பட்டது. இந்த சூழலில் 2025-2026-ம் கல்வியாண்டில் 02.06.2025 (திங்கள் கிழமை) அன்று அனைத்து அரசு மற்றும் அரசு உதவிபெறும் உயர்நிலை/ மேல்நிலைப் பள்ளிகள் திறக்கப்படும் என்று தெரிவிக்கப்பட்டிருந்தது.

இந்நிலையில் கோடை விடுமுறைக்குப் பிறகு கல்லூரிகள் மீண்டும் எப்போது திறக்கப்படும் என்பது குறித்து கல்லூரிக் கல்வி இயக்குநரகம் அறிவிப்பு வெளியிட்டுள்ளது. இதன்படி 2025-2026ஆம் கல்வியாண்டில் அனைத்து அரசு மற்றும் அரசு உதவிபெறும், சுயநிதி கலை அறிவியல் கல்லூரிகள் ஜூன் 16-ம் தேதி (திங்கள் கிழமை) திறக்கப்படும் என்று அறிவிக்கப்பட்டுள்ளது.