விழுப்புரம் வி.மருதூர் ஏரியில் குடிமராமத்து திட்டப் பணிகள் அமைச்சர் சி.வி.சண்முகம் தொடங்கி வைத்தார்

விழுப்புரம் வி.மருதூர் ஏரியில் குடிமராமத்து திட்டப் பணிகளை, மாவட்ட ஆட்சித்தலைவர் முனைவர்.இல.சுப்பிரமணியன்,  தலைமையில்,  சட்டம், நீதிமன்றங்கள் மற்றும் சிறைச்சாலைகள் துறை அமைச்சர் சி.வி.சண்முகம்  தொடங்கி வைத்தார். குடிமராமத்து திட்டப் பணிகளை தொடங்கி வைத்து,  சட்டம், நீதிமன்றங்கள் மற்றும் சிறைச்சாலைகள் துறை அமைச்சர் சி.வி.சண்முகம்  தெரிவித்ததாவது:தமிழ்நாட்டில் 2016 ஆம் ஆண்டு வடகிழக்கு பருவமழை தவறியதால் இதுவரை இல்லாத அளவிற்கு வறட்சி நிலவுகிறது.  இந்த வறட்சியினால் ஏற்படும், குடிநீர் பிரச்சனையை தீர்க்கவும், நீர் ஆதாரங்களை சிக்கனமாக பயன்படுத்தி இவ்வறட்சியினை எதிர்கொள்ள தமிழ்நாடு அரசு பல நடவடிக்கைகளை மேற்கொண்டு வருகிறது.  அதற்காக மழைநீரை சேமித்தல், புதிய நீர் ஆதாரங்களை உருவாக்கி நீர்வள ஆதாரங்களை மேம்படுத்தி, ஒழுங்குபடுத்த, நீர்நிலைகளை மீட்டெடுக்க தமிழ்நாடு அரசு முடிவு செய்துள்ளது.  இதனை குடிமராமத்து திட்டம் மூலம் செயல்படுத்தப்பட உள்ளது.இத்திட்டத்தின் முதல் கட்டமாக பயனீட்டாளர்களின் பங்களிப்புடன் நீர் நிலைகளை புனரமைக்க பண்டைய “குடிமராமத்து” திட்டத்திற்கு புத்துயிர் அளிக்க திட்டமிடப்பட்டுள்ளது.  குடிமராமத்து என்பது பாசன அமைப்பு விவசாயிகள் தங்கள் உழைப்பு மற்றும் பொருள் பங்களிப்பு மூலம் நீர் ஆதாரங்களை நிர்வகித்தல் ஆகும்.  தமிழ்நாட்டில் காவிரி ஆற்றின் குறுக்கே கரிகால்சோழனால் கட்டப்பட்டு குடிமராமத்து மூலம் பராமரிக்கப்படும் கல்லணை இத்திட்டத்திற்கு முன்னோடியாகும். குடிமராமத்து திட்டத்தின் மூலம் நடப்பு நிதி ஆண்டில் விழுப்புரம் மாவட்டத்தில் 101 ஏரிகளில், ரூ.808 லட்சம் மதிப்பீட்டில் இப்பணி மேற்கொள்ளப்படவுள்ளது. இவ்விழாவில், வானூர் சட்டமன்ற உறுப்பினர் எம்.சக்கரபாணி, செயற்பொறியாளர் சண்முகம், உதவி செயற்பொறியாளர் பாலமுருகன், உதவி பொறியாளர் ஞானசேகர், விழுப்புரம் வட்டாட்சியர் பத்மா மற்றும் உயர் அலுவலர்கள் கலந்து கொண்டனர்.