தொடர் மழை காரணமாக காஞ்சிபுரம், செங்கல்பட்டில் 579 ஏரிகள் நிரம்பின

சென்னை : தொடர்மழை காரணமாக காஞ்சிபுரம், செங்கல்பட்டு மாவட்டங்களில் நீர்வளத்துறை கட்டுப்பாட்டில் உள்ள 579 ஏரிகள் நிரம்பி உள்ளதாக தெரிவிக்கப்பட்டுள்ளது. 

மிக்ஜாம் புயல் காரணமாக சென்னையில் அதி கனமழை பெய்ததால் நகரமே தண்ணீரில் தத்தளிக்கிறது. நகர தெருக்களில் எல்லாம் சூழ்ந்துள்ள மழைநீர் கடந்த 2015-ம் ஆண்டு வெள்ளத்தை நினைவுபடுத்தும் வகையில் இருந்தது.

புயல் கரையை கடந்ததை தொடர்ந்து சென்னையில் ஒருசில இடங்களில் தேங்கியுள்ள மழைநீர் வடிந்து வருகிறது. இதனால் சென்னை படிப்படியாக இயல்பு நிலைக்கு திரும்பி வருகிறது. 

இந்த நிலையில், தொடர் மழை காரணமாக காஞ்சிபுரம் மற்றும் செங்கல்பட்டு பகுதியில் நீர்வளத்துறை கட்டுப்பாட்டில் உள்ள 579 ஏரிகள் நிரம்பியுள்ளன. நேற்று முன்தினம் ஒரே நாளில் 262 ஏரிகள் நிரம்பியுள்ளன. 128 ஏரிகள் 75 சதவீதம் முதல் 99 சதவீதம் நிரம்பியுள்ளன. 126 ஏரிகள் 50 சதவீதம்  முதல் 74 சதவீதம் நிரம்பியுள்ளன. 75 ஏரிகள் 25 சதவீதம் முதல் 49 சதவீதம்  நிரம்பியுள்ளன. ஒரு ஏரி 25 சதவீதம் குறைவாக நிரம்பியுள்ளது.