அமெரிக்காவில் கரையை கடந்தது மில்டன் புயல் புளோரிடா மக்கள் கடுமையாக பாதிப்பு

வாஷிங்டன், அமெரிக்காவுக்கு பெரும் அச்சுறுத்தலை ஏற்படுத்திய மில்டன் புயல் கரையை கடந்தது.  

இந்த புயல் காரணமாக புளோரிடா மாகாணத்தில் 20 லட்சத்துக்கும் அதிகமான வீடுகள் மற்றும் வணிக வளாகங்கள் மின்சாரம் இல்லாமல் இருளில் மூழ்கின. சரசோடா கவுண்டி அதன் அண்டைப் பகுதியில் இருக்கும் மனாடீ கவுண்ட் பகுதிகளில் தான் அதிக அளவிலான மின்தடை ஏற்பட்டுள்ளது. 

புளோரிடாவின் கிழக்கு கடற்கரை பகுதியில் உள்ள புனித லூசி கவுன்டியில் உயிரிழப்புகள் ஏற்பட்டுள்ளதாக தகவல் வெளியாகியுள்ளது. ஆனால் உயிரிழப்புகள் எண்ணிக்கை துல்லியமாக தெரியவில்லை என்றும் அதிகாரிகள் தெரிவித்துள்ளனர்.

முன்னதாக இரண்டு வாரங்களுக்கு முன்பு ஹெலேன் புயலால் தாக்கப்பட்ட புளோரிடாவில் இருந்து மக்கள் பாதுகாப்பான இடங்களுக்குச் செல்லுமாறு உத்தரவிடப்பட்டது. ஹெலேன் மற்றும் மில்டன் புயல்களால் புளோரிடாவில் பலத்த சேதம் ஏற்பட்டுள்ளது.

 இதனிடையே, புயல் பாதிப்புகளுக்கு உதவுவதற்காக அமெரிக்காவின் பல பிரபலங்கள் முன்வந்துள்ளனர். டைலர் டெய்லர் ஸ்விப்ட், ஹெலேன் மற்றும் மில்டன் புயல்களால் பாதிக்கப்பட்டவர்களின் நிவாரண பணிகளுக்காக 5 மில்லியன் டாலர்கள் நன்கொடையாக கொடுத்திருப்பதாக தகவல் வெளியாகியுள்ளது.