லிபியாவுக்கு இந்தியா ரூ.14 கோடி உதவி

ஐ.நா.ஜூன்.10 - லிபியாவுக்கு மனிதாபிமான அடிப்படையில் ரூ.14 கோடி உதவி அளிக்கப்படும் என்று இந்தியா அறிவித்துள்ளது. லிபியாவில் அதிபர் கடாபிக்கு எதிராக கலவரம் நடந்து வருகிறது. இதனால் அந்த நாடு பெரிதும் பாதித்துள்ளது. பாதிப்பை சரிக்கட்ட ஐக்கிய நாடுகள் சபை நிதி திரட்டி வருகிறது. இதற்கு ரூ.14 கோடி நிதியுதவி அளிக்கப்படும் என்று இந்தியா அறிவித்துள்ளது. இந்த 14 கோடியில் 4.5 கோடி ஐக்கிய நாடுகள் சபையின் மனிதாபிமான விவகாரத்திற்கான ஒருங்கிணைப்பு அலுவலகம் மூலம் ரொக்கமாக வழங்கப்பட்டுவிட்டது. லிபியாவின் தலைநகர் திரிபோலி மற்றும் பெங்காஜி நகருக்கு ரூ.4 கோடி அளவுக்கு நிவாரணப்பொருட்களும் மருந்து பொருட்களும் அனுப்பப்படும் என்றும் ஐ.நா.வுக்கான இந்தியாவின் நிரந்தர உறுப்பினர் ஹர்தீப் சிங் பூரி வெளியிட்டுள்ள அறிக்கையில் கூறியுள்ளார்.