திருப்பதி கோயிலில் ரத சப்தமி விழா

நகரி, ஜன. 22 - திருப்பதி ஏழுமலையான் கோயிலில் ஆண்டுதோறும் ரத சப்தமி விழா வெகுசிறப்பாக கொண்டாடப்படுவது வழக்கம். இந்த ஆண்டும் வருகிற 30 ம் தேதி ரத சப்தமி விழா கொண்டாடப்படுகிறது. இதையொட்டி கோயிலில் சிறப்பு ஏற்பாடுகள் செய்யப்பட்டுள்ளன. 30 ம் தேதி காலை சூரிய பிரபை வாகனத்திலும், பின்னர் சின்ன சேஷ வாகனத்திலும், கருட வாகனத்திலும், அனுமந்த வாகனத்திலும், கல்ப விருட்ச வாகனத்திலும், சர்வ பூபால வாகனத்திலும், சந்திர பிரபை வாகனத்திலும் ஏழுமலையான் உலா வருகிறார். ஒரே நாளில் ஏழு வாகனங்களிலும் ஒன்றன்பின் ஒன்றாக ஏழுமலையான் வருவதால் இதை காண ஏராளமான பக்தர்கள் வருவார்கள். இதனால் இத்திருநாளில் கூடுதல் போலீசாரை பாதுகாப்பு பணியில் ஈடுபடுத்த தேவஸ்தான அதிகாரிகள் திட்டமிட்டுள்ளனர். திருப்பதி கோயிலில் வழங்கப்படும் ஏழுமலையானின் 10 கிராம் தங்க டாலரின் விலை நேற்று ரூ. 300 உயர்த்தப்பட்டு, ரூ. 30 ஆயிரத்து 195 க்கு விற்கப்படுகிறது. இதே போல் 5 கிராம் டாலர் ரூ. 150 உயர்த்தப்பட்டு ரூ. 15 ஆயிரத்து 285 க்கும், 2 கிராம் டாலர் ரூ. 6 ஆயிரத்து 25 க்கும் விற்கப்படுகிறது. தங்கம் விலை தொடர்ந்து உயருவதால் இந்த விலையேற்றத்தை செய்துள்ளோம் என்று தேவஸ்தான அதிகாரிகள் தெரிவித்தனர்.