லண்டன் : ஸ்காட்லாந்தில் சீக்கிய கோவிலுக்குள் செல்ல முடியாமல் இந்திய தூதர் தடுத்து நிறுத்தப்பட்டதால் திரும்பி சென்று விட்டதாக கூறப்படுகிறது. 

பிரிட்டனுக்கான இந்தியத் தூதர் விக்ரம் துரைசாமி, ஸ்காட்லாந்தில் கிளாஸ்கோ நகரில் உள்ள ஒரு சீக்கிய கோவிலுக்குள் செல்ல முயன்றார். ஆனால் அவர் உள்ளே செல்ல முடியாமல் தடுத்து நிறுத்தப்பட்டதாகவும் பிறகு அவர் திரும்பிச் சென்று விட்டதாகவும் தெரிவிக்கப்பட்டு உள்ளது.

சீக்கிய தீவிரவாதி கொலை தொடர்பில் கனடாவுக்கும் இந்தியாவுக்கும் இடையில் பிரச்சினை மூண்டுள்ள நிலையில் புதிதாக இந்தப் பிரச்சினை தலை எடுத்துள்ளது. ஸ்காட்லாந்து சம்பவம் தொடர்பில் இன்ஸ்டகிராமில் பிரிட்டன் இளம் சீக்கியர் என்ற அமைப்பு காணொளி ஒன்றைப் பதிவேற்றியது.

அந்தக் கோயிலுக்குள் செல்ல முயன்ற தூதரை, ஆடவர் ஒருவர் தடுத்து நிறுத்தியதை காணொளி காட்டியது. அந்த ஆடவர் காலிஸ்தான் ஆதரவாளர் என்று இந்திய அரசு வட்டாரங்கள் தெரிவித்துள்ளன.