வங்கதேசத்திலிருந்து மேலும் 77 தமிழக மாணவர்கள் சென்னை திரும்பினர்

சென்னை : முதல் கட்டமாக 49 மாணவர்கள் வங்கதேசத்திலிருந்து தமிழகம் அழைத்துவரப்பட்ட நிலையில் மேலும் 77 மாணவர்கள் சென்னை திரும்பினர்.

வங்கதேசத்தில் ஏற்பட்ட கலவரம் காரணமாக அங்கு கல்வி பயின்று கொண்டிருக்கும் இந்திய மாணவர்கள் உடனடியாக இந்தியா திரும்பும்படி மத்திய அரசு உத்தரவிட்டது. இதையடுத்து அவர்களை மீட்டு தமிழகம் அழைத்து வர மாநில அரசின் சார்பில் நடவடிக்கைகள் மேற்கொள்ளப்பட்டன.

முதல்கட்டமாக கிருஷ்ணகிரி மாணவர்கள் 12 பேர், கடலூர் மாணவர்கள் 6 பேர், தருமபுரி, தஞ்சாவூர் மாவட்டங்களைச் சேர்ந்த தலா 5 மாணவர்கள், சேலத்தைச் சேர்ந்த 3 மாணவர்கள், வேலூர், ராணிப்பேட்டை, மதுரை, சென்னை, விருதுநகர் மாவட்டங்களைச் சேர்ந்த தலா 2 பேர், ஈரோடு, திருவள்ளூர், விழுப்புரம், தென்காசி, திருவண்ணாமலை, தூத்துக்குடி, காஞ்சிபுரம், மயிலாடுதுறை ஆகிய மாவட்டங்களைச் சேர்ந்த தலா ஒருவர் என மொத்தம் 49 மாணவர்கள் கொல்கத்தா, குவாஹாட்டி, அகர்தலா ஆகிய நகரங்களின் வழியாக ஞாயிற்றுக்கிழமை இரவு 9.15 மணியளவில் சென்னை வந்தடைந்தனர்.

இந்நிலையில் மேலும் 77 மாணவர்கள் நேற்று தமிழகம் வந்தனர். மாணவர்களுக்கு விமான கட்டணம் முதல் அவர்கள் இல்லம் வரை சென்று சேரும் வரை அனைத்து செலவுகளையும் தமிழகத்தின் அயலகத்ததுறை ஏற்றுள்ளது குறிப்பிடத்தக்கது.