பல்வேறு போட்டித் தேர்வுகள் மூலம் ரூ. 3,500 கோடி வருவாய் ஈட்டிய தேசிய தேர்வு முகமை

புது டெல்லி, தேசிய தேர்வு முகமை அமைப்பு இதுவரை நடத்திய தேர்வுகளிலிருந்து கட்டணம் மூலமாக ரூ.3,513 கோடி லாபம் ஈட்டியுள்ளது. 

 மருத்துவ படிப்புகளுக்கான நீட் தேர்வு, பல்கலைக் கழக நுழைவுத்தேர்வான கியூட், பொறியியல் படிப்புகளுக்கான ஜே.இ.இ தேர்வு உள்ளிட்ட பல்வேறு தேர்வுகளைத் தேசிய தேர்வு முகமை நடந்தி வருகிறது. கடந்த 2018-ம் ஆண்டு மத்திய பா.ஜ.க. அரசால் உருவாக்கப்பட்ட இந்த தேசிய தேர்வு முகமை அமைப்பு இதுவரை நடத்திய தேர்வுகளிலிருந்து கட்டணம் மூலமாக ரூ.3,513 கோடி லாபம் ஈட்டியுள்ளது. 

கடந்த புதன்கிழமை பாராளுமன்ற மாநிலங்களவையில் காங்கிரஸ் எம்.பி விவேக் எழுப்பிய கேள்விக்கு  மத்திய கல்வித் துறை இணை அமைச்சர் சுகந்தா மஜூம்தார் பதிலளித்து பேசும் போது இந்த தகவலை தெரிவித்துள்ளார்.

ஈட்டிய தொகையில் 87.2 சதவீதம் தேர்வுகளை நடத்துவதற்காக செலவிடப்படுகிறது என்றும் அவர் தெரிவித்தார். குறிப்பாக கடந்த 2022-ம் ஆண்டு அறிமுகப்படுத்தப்பட்ட கியூட் பல்கலைக்கழக நுழைவுத் தேர்வுகளுக்குப் பிறகு தேசிய தேர்வு முகமையின் வருமானம் 78 சதவீதம் அதிகரித்துள்ளது. 2021-22 ஆண்டில் தேசிய தேர்வு முகமை ரூ. 490 கோடி ஈட்டிய நிலையில் 2022-23 ஆண்டு காலத்தில் ரூ.873 கோடி ஈட்டியுள்ளது.