இந்தியாவுக்கு வரி: ஐரோப்பிய நாடுகளை தூண்டிவிட்ட ட்ரம்ப்

வாஷிங்டன்: இந்தியாவுக்கு 100 சதவீதம் வரி விதியுங்கள் விதிக்க ஐரோப்பிய நாடுகளை தூண்டிவிட்டார் அமெரிக்க அதிபர் ட்ரம்ப்.

அமெரிக்காவில் இறக்குமதி ஆகும் இந்திய பொருட்களுக்கு அமெரிக்கா 25 சதவீத வரி விதித்தது. ரஷியாவிடம் கச்சா எண்ணெய் வாங்குவதற்கு அபராதமாக இந்திய பொருட்களுக்கு கூடுதலாக 25 சதவீத வரி விதித்தது. இதனால் மொத்த வரி 50 சதவீதமாக உயர்ந்தது.இதற்கிடையே, அமெரிக்க ஜனாதிபதி தனது நிலைப்பாட்டில் இருந்து சற்று இறங்கி வந்தார். பிரதமர் மோடியுடன் பேச்சுவார்த்தை நடத்த ஆவலாக இருப்பதாக ட்ரம்ப் தெரிவித்தார். இதனை பிரதமர் மோடியும் ஏற்றுக்கொண்டார்.

இதனிடையே இந்தியாவுக்கு எதிராக, ட்ரம்ப் மீண்டும் பேசியதாக தகவல் வெளியாகி உள்ளது.உக்ரைனுக்கு எதிராக போரில் ஈடுபட்டுள்ள ரஷியாவின் பொருளாதார பாதிப்பை அதிகரிப்பதற்கான வழிவகைகளை ஆராய்வதற்காக அமெரிக்கா மற்றும் ஐரோப்பிய நாடுகளின் உயர் அதிகாரிகள் வாஷிங்டனில் கூடி ஆலோசனை நடத்தினர்.அப்போது, ட்ரம்ப் தொலைபேசி மூலம் அதிகாரிகளை தொடர்பு கொண்டார். ரஷியாவிடம் கச்சா எண்ணெய் வாங்கும் இந்தியா மற்றும் சீனா மீது 100 சதவீதம்வரை வரி விதிக்குமாறு ஐரோப்பிய நாடுகளை அவர் கேட்டுக்கொண்டார். ஒரு ஆங்கில பத்திரிகையில் இத்தகவல் வெளியாகி உள்ளது.

உக்ரைன் போரை முடிவுக்கு கொண்டுவர ரஷியாவுக்கு அழுத்தம் கொடுக்கும் கூட்டு முயற்சியின் ஒரு அங்கமாக ட்ரம்ப் இதை வலியுறுத்தியதாக அதில் கூறப்பட்டுள்ளது. இந்தியா, சீனா மீது ஐரோப்பிய நாடுகள் விதிக்கும் எந்த வரியையும் பிரதிபலிக்க அமெரிக்கா தயாராக இருப்பதாக ஒரு அமெரிக்க அதிகாரி கூறினார்.