4 மாநில தேர்தல் முடிவு: நடிகை குஷ்பு கருத்து

சென்னை : 4 மாநிலத் தேர்தலில் பா.ஜ.க.வின் வெற்றி பிரதமர் மோடி மீது மக்கள் வைத்துள்ள நம்பிக்கையை பிரதிபலிக்கிறது என்று நடிகை குஷ்பு தெரிவித்துள்ளார். 

பா.ஜ.க. தேசிய மகளிர் அணி உறுப்பினரும், பிரபல நடிகையுமான குஷ்பு 4 மாநில தேர்தல் முடிவு குறித்து கூறியதாவது:-

ராஜஸ்தான், மத்திய பிரதேசம், சத்தீஸ்கர் மாநிலங்களில் பா.ஜ.க. ஆட்சி அமைக்க இருக்கிறது. 4 மாநிலத் தேர்தலில் பா.ஜ.க.வின் வெற்றி மக்கள் பிரதமர் மோடி மீது வைத்துள்ள நம்பிக்கையை பிரதிபலிக்கிறது.

தேர்தலுக்கு முன்னதாக எதிர்க்கட்சிகளை சேர்ந்தவர்கள் பாராளுமன்ற தேர்தலுக்கு முன்னோட்டமாக கருதப்படும் இந்த 4 மாநிலத் தேர்தல் செமி பைனல் (அரையிறுதி) ஆட்டம் போன்றது என்று வர்ணித்தனர். 

தற்போது அவர்கள் அரையிறுதியிலேயே தோல்வியடைந்து வெளியேறி விட்டனர்.பாராளுமன்ற தேர்தலில் பா.ஜ.க.வின் இலக்கு 400 இடங்களில் வெற்றி பெறுவதாகும். அதை இந்த தேர்தல் உறுதி செய்துள்ளது. ராகுல் காந்தியை மக்கள் நிராகரித்து விட்டனர். இவ்வாறு குஷ்பு தெரிவித்தார்.