இண்டியா கூட்டணி கட்சிகளின் ஆலோசனை கூட்டம் ஒத்திவைப்பு

புதுடெல்லி : இண்டியா கூட்டணி கட்சிகளின் ஆலோசனை கூட்டம் இம்மாதம் 3-வது வாரத்திற்கு  ஒத்திவைக்கப்பட்டுள்ளது. 

.2024 மக்களவை தேர்தலில் பா.ஜ.க.வை வீழ்த்தும் நோக்கத்துடன் தி.மு.க, காங்கிரஸ், திரிணாமுல் காங்கிரஸ், தேசியவாத காங்கிரஸ், ஆம் ஆத்மி, சமாஜ்வாடி, உத்தவ் தாக்கரே சிவசேனா உள்ளிட்ட 26 எதிர்க்கட்சியினர் ஒன்றிணைந்து இண்டியா என்ற புதிய கூட்டணியை உருவாக்கி உள்ளனர்.

இக்கூட்டணியின் சார்பில் 3 கூட்டங்கள் நடந்து முடிந்துள்ளன. இதனிடையே தெலுங்கானா, மத்திய பிரதேசம், ராஜஸ்தான், சத்தீஸ்கர், மிசோரம் ஆகிய 5 மாநில பேரவை தேர்தல் தேதிகள் அறிவிக்கப்பட்டதால் இண்டியா கூட்டணியின் அடுத்த கூட்டம் நடைபெறவில்லை. 

இந்நிலையில் இண்டியா கூட்டணியின் 4-வது கூட்டம் டெல்லியில் இன்று  கூடும் என அறிவிக்கப்பட்டிருந்தது. இந்த கூட்டத்தில் காங்கிரசின் 4 மாநில தேர்தல் தோல்வி பாராளுமன்ற தேர்தலில் எப்படி தாக்கத்தை ஏற்படுத்தும் என்பது குறித்து விவாதிக்கப்படும் என எதிர்பார்க்கப்பட்டது.

ஆனால் இந்த கூட்டத்தில மம்தா பானர்ஜி, நிதிஷ் குமார், அகிலேஷ் யாதவ், மு.க. ஸ்டாலின், ஜார்க்கண்ட் முதல்வர் ஹேமந்த் சோரன் ஆகியோர் கலந்து கொள்ள வாய்ப்பில்லை என தகவல் வெளியானது.

தங்களது கட்சி பிரதிநிதிகளை அனுப்பி வைக்க முடிவு செய்தனர்.முக்கியமான தலைவர்கள் பங்கேற்காமல் ஆலோசனை கூட்டம் நடைபெற்றால் அது சரியாக இருக்குமா? என்ற கேள்வி எழுந்தது. இந்த நிலையில் கூட்டம் டிசம்பர் 3-வது வாரத்திற்கு ஒத்திவைக்கப்பட்டுள்ளது.