விக்கிரவாண்டியில் தி.மு.க வெற்றி: தொண்டர்களுக்கு இனிப்புகளை வழங்கினார் முதல்வர் மு.க.ஸ்டாலின்

சென்னை : விக்கிரவாண்டி இடைத்தேர்தலில் திமுக வெற்றியை தொடர்ந்து அண்ணா அறிவாலயத்தில் தி.மு.க. தொண்டர்களுக்கு நேற்று முதல்வர் மு.க.ஸ்டாலின் இனிப்புகளை வழங்கினார்.

விக்கிரவாண்டி தொகுதி இடைத்தேர்தல் வாக்கு எண்ணிக்கையில் தி.மு.க. தொடர்ந்து முன்னிலையில் இருந்தது. அப்போது சென்னையில் தி.மு.க. தலைமை அலுவலகமான அண்ணா அறிவாலயம் வந்த முதல்வர் மு.க.ஸ்டாலின், அங்கிருந்த தொண்டர்களுக்கு இனிப்புகள் வழங்கி மகிழ்ச்சியை பகிர்ந்து கொண்டார்.

விக்கிரவாண்டி தொகுதி இடைத்தேர்தல் வாக்கு எண்ணிக்கை நேற்று (சனிக்கிழமை) காலை 8 மணிக்கு தொடங்கி விறுவிறுப்பாக நடைபெற்றது. இதில் தி.மு.க. பேட்பாளர் அன்னீயூர் சிவா வெற்றிப்பெற்றார்.  இதனையடுத்து வாக்கு எண்ணிக்கை மையத்தை சுற்றியும், தொகுதியில் ஆங்காங்கேயும் தி.மு.க. தொண்டர்கள் உற்சாக கொண்டாட்டங்களில் ஈடுபட்டனர். இனிப்புகளை வழங்கியும், பட்டாசுகள் வெடித்தும் கொண்டாட்ட மனநிலையில் தி.மு.க. தொண்டர்கள் இருந்தனர் அதேபோல், சென்னையில் தி.மு.க. தலைமை நிலையமான அண்ணா அறிவாலயத்திலும் தி.மு.க. தொண்டர்கள் உற்சாக கொண்டாட்டத்தில் ஈடுபட்டனர்.

முன்னதாக, சென்னையில், செய்தியாளர்களை சந்தித்த தி.மு.க. அமைப்புச்செயலாளர் ஆர்.எஸ்.பாரதி, கள்ளக்குறிச்சி சோக சம்பவம், ஆம்ஸ்ட்ராங் கொலை என்ற இந்த இரண்டு மிகப்பெரிய சவால்களுக்கு மத்தியில், முதல்வர் ஸ்டாலினின் நேர்மையான ஆட்சியை மக்கள் ஏற்றுக்கொண்டு மகத்தான வெற்றியை கொடுத்துள்ளனர். வெற்றி தேடித்தந்த விக்கிரவாண்டி தொகுதி மக்களுக்கு தி.மு.க. வாழ்நாள் முழுவதும் கடமைப்பட்டிருக்கிறது என்று கூறியிருந்தார்.

இந்நிலையில், தி.மு.க. தலைமை அலுவலகமான அண்ணா அறிவாலயம் வந்த முதல்வர் மு.க.ஸ்டாலின், அங்கிருந்த தொண்டர்களுக்கு இனிப்புகளை வழங்கி மகிழ்ச்சியை பகிர்ந்து கொண்டார். அப்போது அவருடன் அமைச்சர் துரைமுருகன் உள்ளிட்ட கட்சியின் முக்கிய நிர்வாகிகள் உடனிருந்தனர்.