தமிழகத்தில் ரூ.4 ஆயிரம் கோடியில் 10,545 கி.மீ. தூரத்திற்கு சாலைகள் அமைச்சர் ஐ. பெரியசாமி தகவல்

சென்னை, ரூ.4 ஆயிரம் கோடியில் 10,545 கி.மீ. தூரம் சாலைகள் போடப்பட்டுள்ளன என்று சட்டசபையில் அமைச்சர் ஐ. பெரியசாமி தெரிவித்துள்ளார்.

தமிழக சட்டசபையில் உறுப்பினர் எழுப்பிய கேள்விக்கு அமைச்சர் ஐ. பெரியசாமி அளித்த பதில் பின்வருமாறு:- கலைஞர் கனவு இல்லம் திட்டத்திற்காக ரூ. 3,500 கோடி ஒதுக்கீடு செய்யப்பட்டுள்ளது.  இதுவரை 25,000 வீடுகள் கட்டி முடிக்கப்பட்டுள்ளன. ரூ. 2,418 கோடி நிதி விடுவிக்கப்பட்டுள்ளது. அடுத்த மார்ச் மாதத்திற்குள் கலைஞர் கனவு இல்ல திட்டத்தில் 2 லட்சம் வீடுகள் கட்டி முடிக்கப்படும். திமுக ஆட்சிக்கு வந்த பிறகு 1,122 கோடி ரூபாயில் 3 ஆயிரம் பள்ளி கட்டிடங்கள் கட்டப்பட்டுள்ளன.  4 ஆயிரம் கோடி ரூபாயில் 10,545 கிலோ மீட்டர் தூரம் சாலைகள் போடப்பட்டுள்ளன. தமிழ்நாட்டில் இன்னும் 8 கிராமங்கள்தான் இணைக்கப்படாமல் உள்ளன. இவ்வாறு ஐ. பெரியசாமி தெரிவித்தார்.