சென்னை,ஏப்.29 - வாக்கு எண்ணிக்கைக்கு தடை விதிக்க சென்னை ஐகோர்ட்டு மறுத்துவிட்டது. அதே நேரத்தில் வாக்காளர்களுக்கு பணம் கொடுத்த விவகாரம் தொடர்பாக அரசியல் கட்சிகளின் அங்கீகாரத்தை ரத்து செய்ய கோரும் புகார் மனுவை 6 வாரத்தில் பரிசீலிக்கும்படி தேர்தல் ஆணையத்திற்கு சென்னை ஐகோர்ட்டு உத்தரவிட்டுள்ளது. சென்னையை சேர்ந்த சமூக சேவகர் டிராபிக் ராமசாமி என்பவர் ஐகோர்ட்டில் தாக்கல் செய்த பொதுநல மனுவில் கூறப்பட்டிருப்பதாவது;

தேர்தலின் போது வாக்காளர்களுக்கு பணம் கொடுக்க முயன்றதாக 1,700 வழக்குகள் பதிவு செய்யப்பட்டுள்ளன. சுமார் 55 கோடி ரூபாய் பறிமுதல் செய்யப்பட்டுள்ளது. கட்சி வித்தியாசமின்றி அனைத்து அரசியல் கட்சியினர் மீதும் வழக்கு பதிவு செய்யப்பட்டுள்ளன.

இது தேர்தல் நடத்தை விதிமுறைகளுக்கு எதிரானது. ஆகவே இந்த செயலில் ஈடுபட்டவர்கள் சார்ந்த அரசியல் கட்சிகளின் அங்கீகாரத்தை ரத்து செய்யக்கோரி தேர்தல் ஆணையத்திடம் இரண்டு முறை புகார் மனு கொடுத்தேன். அதன் மீது எந்த நடவடிக்கையும் எடுக்கவில்லை. ஆகவே எனது மனுவை பரிசீலித்து உரிய நடவடிக்கை எடுக்கும்படி தேர்தல் ஆணையத்திற்கு உத்தரவிடவேண்டும். இந்த வழக்கு முடியும் வரை வாக்கு எண்ணிக்கையை நிறுத்தி வைக்கவேண்டும். இவ்வாறு அந்த மனுவில் கூறியிருந்தார். இந்த மனுவை தலைமை நீதிபதி இக்பால், நீதிபதி சிவஞானம் ஆகியோர் விசாரித்து வாக்குஎண்ணிக்கையை நிறுத்த உத்தரவிட முடியாது என்று மறுத்துவிட்டனார். அதேவேளையில் வாக்காளர்களுக்கு பணம் கொடுத்த விவகாரம் தொடர்பாக அரசியல் கட்சிகளின் அங்கீகாரத்தை ரத்து செய்யக்கோரும் மனுதாரரின் புகாரை 6 வார காலத்தில் பரிசீலிக்கக்கோரிதேர்தல் ஆணையத்திற்கு நீதிபதிகள் உத்தரவிட்டனர்.