பாகிஸ்தானில் தலிபான் தாக்குதலில் 25 வீரர்கள் பலி

இஸ்லாமாபாத்,ஜூன்.3 - ஆப்கானிஸ்தானில் இருந்து நூற்றுக்கணக்கான தலிபான் தீவிரவாதிகள் பாகிஸ்தானின் வடமேற்கு பகுதிக்குள் நுழைந்து அங்குள்ள சோதனை சாவடி ஒன்றில் நடத்திய கொடூர தாக்குதலில் சுமார் 25 பாதுகாப்பு வீரர்கள் கொல்லப்பட்டார்கள். 

பயங்கர ஆயுதங்களுடன் ஆப்கனில் இருந்து பாகிஸ்தானில் ஊடுருவிய இவர்கள் சலோத்தல் என்ற இடத்தில் உள்ள சோதனை சாவடி மீது திடீர் தாக்குதல் நடத்தினார்கள். இதையடுத்து தீவிரவாதிகளுக்கும் பாதுகாப்பு படையினருக்கும் இடையே கடுமையான துப்பாக்கி சண்டை நீடித்தது. இந்த சண்டை சுமார் 24 மணி நேரம் நீடித்ததாக தகவல்கள் தெரிவிக்கின்றன. இதில் 25 பாதுகாப்பு வீரர்கள் பலியாகி விட்டனர். அவர்களது உடலை அப்புறப்படுத்தும் பணி நடந்து வருகிறது. தாக்குதலுக்கு உள்ளான சோதனை சாவடி எல்லைப் பகுதிக்கு அருகாமையில் உள்ளது. இந்த சம்பவம் குறித்து கேள்விப்பட்டதும் கூடுதல் போலீஸ் படையினரும், ராணுவத்தினரும் சம்பவம் நடந்த பகுதிக்கு விரைந்து தீவிரவாதிகளை தேடும் பணியில் ஈடுபட்டனர். ஹெலிகாப்டர் மூலமாகவும் தலிபான் தீவிரவாதிகளை தேடும் பணி முடுக்கி விடப்பட்டுள்ளது. 2 ஆண்டுகளுக்கு முன்பிருந்தே தலிபான்களுக்கு எதிரான நடவடிக்கையில் பாகிஸ்தான் ராணுவத்தினர் ஈடுபட்டு வருவதாக அங்கிருந்து வரும் தகவல்கள் தெரிவிக்கின்றன.