டி - 20 கிரிக்கெட்டில் அணியை கேப்டனாக வழிநடத்தியவர்களில் டோனிக்கு முதலிடம்

துபாய் : டி - 20 கிரிக்கெட்டில் அணியை கேப்டனாக வழிநடத்தியவர்களில் டோனி முதலிடத்தில் உள்ளார். அவர் கேப்டனாக 300 போட்டிகளில் இதுவரை அணியை வழிநடத்தியுள்ளார். 14-வது ஐ.பி.எல். போட்டி அவர் வழிநடத்திய 300வது போட்டியாகும்.

நடப்பு ஐ.பி.எல் சீசனின் சாம்பியன் யார் என்பதை முடிவு செய்யும் இறுதிப் போட்டியில் சென்னை சூப்பர் கிங்ஸ் மற்றும் கொல்கத்தா நைட் ரைடரஸ் அணிகள் நேற்று விளையாடின. டி20 கிரிக்கெட்டில் கேப்டனாக டோனி பங்கேற்கும் 300-வது போட்டி. அதோடு ஒன்பதாவது முறையாக சென்னை அணியை இறுதிப் போட்டியில் வழிநடத்துகிறார் டோனி. 

சக்சஸ் ரேட்... 

டி20 கிரிக்கெட்டில் டோனி கேப்டனாக அணியை வழிநடத்தினால் 59.79 வெற்றி வாய்ப்பை உறுதி செய்வார் என அவரது சக்சஸ் ரேட் சொல்கிறது. சர்வதேச கிரிக்கெட்டில் இந்திய அணியை கேப்டனாக 72 டி20 போட்டிகளில் வழிநடத்திய டோனி 41 வெற்றிகளையும், 28 தோல்விகளையும் சந்தித்துள்ளார். ஒரு போட்டி சமனிலும், இரண்டு போட்டிகளில் முடிவு எட்டப்படவில்லை. 

130 வெற்றிகள்...

டோனி தலைமையிலான சென்னை அணி 213 போட்டிகளில் விளையாடி 130 வெற்றிகள், 81 தோல்விகளை தழுவியுள்ளது. புனே அணிக்காக 14 போட்டிகளில் கேப்டனாக டோனி செயல்பட்டுள்ளார். அதில் 5 வெற்றிகள், 9 தோல்விகளை அந்த அணி சந்தித்துள்ளது. டி20 போட்டிகளில் அணியை அதிக முறை வழிநடத்திய கேப்டன்கள் பட்டியலில் முதலிடத்தில் இருப்பவர் டோனி தான்.