புது டெல்லி,  மகளிர் இடஒதுக்கீடு மசோதாவை ஒருமனதாக நிறைவேற்றியதற்காக நாடாளுமன்ற மக்களவை உறுப்பினர்களுக்கு நன்றி தெரிவித்த பிரதமர் மோடி, பாராளுமன்ற வரலாற்றில் இது ஒரு பொன்னான தருணம் என்று கூறினார். 

பாராளுமன்ற சிறப்புக் கூட்டத் தொடரின் நான்காவது நாளில் நேற்று மக்களவைக் கூடியது. அப்போது சிறிய உரையாற்றுவதற்காக எழுந்த பிரதமர் மோடி, இந்த அவையின் தலைவர் என்ற முறையில் இந்தப் புனிதமான பணியில் பங்களிப்பு செய்த, ஆதரவளித்த, ஆக்கபூர்வமாக விவாதித்த அனைத்து உறுப்பினர்களுக்கும் நான் நெஞ்சார்ந்த நன்றியினைத் தெரிவித்துக் கொள்கிறேன். முக்கியமான மசோதா நிறைவேற்றியதன் பெருமை, அவையின் அனைத்து உறுப்பினர்கள் மற்றும் பாராளுமன்றத்தின் உள்ளேயும் வெளியேயும் உள்ள அனைத்து அரசியல் கட்சித் தலைவர்களையும் சேரும். 

இந்த பாராளுமன்ற முடிவுகள் தாய் சக்தியின் நிலையை மாற்றும். அது உருவாக்கும் நம்பிக்கை, நாட்டை கற்பனை செய்ய முடியாத அளவிலான உயரத்துக்கு எடுத்துச் செல்வதற்கான சக்தியாக உருவெடுக்கும் என்று பிரதமர் மோடி நெகிழ்ச்சியுடன் தெரிவித்தார்.