வயநாடு எம்.பி. பதவி ராஜினாமா: மக்களவை தலைவருக்கு கடிதம் அனுப்பினார் ராகுல்

புதுடெல்லி : வயநாடு எம்.பி. பதவியை அதிகாரப்பூர்வமாக ராஜினாமா செய்துள்ள ராகுல்காந்தி, இதுதொடர்பாக மக்களவை தலைவருக்கு கடிதம் அனுப்பியுள்ளார்.

அண்மையில் நடந்து முடிந்த 18-வது மக்களவைத் தேர்தலில் உத்தர பிரதேசத்தின் ரேபரேலி, கேரளத்தின் வயநாடு ஆகிய இரு தொகுதிகளில் ராகுல் காந்தி களம் கண்டார். இரு தொகுதிகளில் வென்ற ராகுல், தேர்தல் முடிவுகள் வெளியான ஜூன் 4-ஆம் தேதியிலிருந்து 14 நாள்களுக்குள்(ஜூன் 18) ஏதேனும் ஒரு தொகுதியின் எம்.பி. பதவியை ராஜிநாமா செய்ய வேண்டியது கட்டாயம்.

வயநாட்டில் 3.6 லட்சம் வாக்குகள் வித்தியாசத்தில் வெற்றியடைந்த ராகுல் காந்தி, வயநாடு தொகுதி எம்.பி.யாகப் பதவியேற்கப் போவதில்லை என்று நேற்று முன்தினம் (ஜூன் 17) அறிவித்தார்.

இதையடுத்து, இது குறித்து மக்களவை தலைவர் அலுவலகத்துக்கு கடிதம் மூலம் அதிகாரப்பூர்வமாக தகவல் தெரிவித்துள்ளார். அதில் ரேபரேலி தொகுதியைத் தக்க வைப்பதாக தெரிவித்துள்ளார். வயநாட்டில் நடைபெறவுள்ள இடைத்தேர்தலில் பிரியங்கா காந்தி முதன் முறையாக காங்கிரஸ் வேட்பாளராக போட்டியிடவுள்ளது குறிப்பிடத்தக்கது.