மதுரையில் வெள்ளத்தடுப்பு நடவடிக்கை: அதிகாரிகளுடன் முதல்வர் மு.க.ஸ்டாலின் ஆலோசனை

மதுரை : மதுரையில் வெள்ளத்தடுப்பு நடவடிக்கைகள் குறித்து முதல்வர் மு.க.ஸ்டாலின் நேற்று அதிகாரிகளுடன் ஆலோசனை நடத்தினார்.

ராமநாதபுரம் மாவட்டம் கமுதி அருகே உள்ள பசும்பொன்னில் முத்துராமலிங்கத் தேவரின் 117-வது ஜெயந்தி விழா மற்றும் குருபூஜை விழா நேற்று நடைபெற்றது. இதில் பங்கேற்று அவருக்கு  முதல்வர் மு.க. ஸ்டாலின் மரியாதை செலுத்தினார்,  இந்த நிலையில், மதுரையில் வெள்ளத்தடுப்பு நடவடிக்கைகள் குறித்து முதல்வர் மு.க.ஸ்டாலின் ஆலோசனை நடத்தினார். 

மதுரை மாவட்ட கலெக்டர், மாநகராட்சி ஆணையர், மாவட்ட அமைச்சர்கள், அதிகாரிகளுடன் ஆலோசனை நடத்தினார். கனமழை பாதிப்புகள் குறித்தும் மேற்கொள்ளப்பட்ட நடவடிக்கைகள் குறித்தும் அதிகாரிகளிடம் முதல்வர் கேட்டறிந்தார்.

மதுரையில் கடந்த 3 நாட்களுக்கு முன் பெய்த பலத்த மழையால் தெருக்கள், குடியிருப்புகளை மழைநீர் சூழ்ந்தது. குடியிருப்புகளில் தண்ணீர் புகுந்ததால் மக்கள் கடும் அவதி அடைந்தனர். போர்க்கால நடவடிக்கை எடுத்து இயல்பு நிலைக்கு கொண்டுவர முதல்வர் மு.க.ஸ்டாலின் உத்தரவிட்டிருந்தது குறிப்பிடத்தக்கது.