டியர் டெத் விமர்சனம்

டியர் டெத் என்ற சொல் சிலரை பயமுறுத்தும். அந்த பயத்தை போக்குவது தான் இப்படத்தின் கரு. 4 தனித்தனி சிறு கதைகளின் தொகுப்பாக இப்படம் உருவாகி இருக்கிறது. ஒவ்வொரு கதையிலும் தலா ஒரு மரணம் என்று வகையில் நிகழ்கிறது. அது இயற்கை மரணமா அல்லது வேறு வகையிலா என்பதை புதியக் கோணத்தில் சொல்லியிருக்கிறார் படத்தின் இயக்குனர் பிரேம்குமார், தொடக்க காட்சியில் வானத்தில் வட்டமடித்து வவ்வாலாக வந்திறங்கும் சந்தோஷ் பிரதாப் நான் தான் மரணம் என்று அறிமுகப்படுத்திக் கொள்வது திடுக் காட்சி. முதல் கதையில் கொரோனா வைரஸால் மனைவியை பறிகொடுக்கும் கணவன் கதறி அழும்போது கலங்க வைக்கிறார். படுக்கையில் கிடக்கும் தனது தாய்க்காண பணிவிடையில் பெரியவர் வெங்கடேசன் நடிப்பில் வின்னைத் தொடுகிறார். ஒன்றாக பள்ளி பருவத்தில் சுற்றும் நான்கு நண்பர்கள் பின்னர் வாழ்க்கைப் பாதையில் ஆளுக்கொரு திசையாக சென்றாலும் நட்பு மட்டும் மாறாமல் பயணிப்பது பசுமை நினைவுகள். நான்கு கதைகளும் மெல்ல நகர்ந்து  டாகுமென்டிரி படமாகவே பதிவாகிறது. இப்படத்தினை ஐஸ்வர்யா தியாகராஜன், சதீஷ் நாகராஜன் தயாரித்திருக்கின்றனர். இசை நவீன் அண்ணாமலை, கதை திரைக்கதையை ஸ்ரீதர் வெங்கடேசன் எழுத படத்தை இயக்கியுள்ளார் பிரேம்குமார். மொத்தத்தில் டியர் டெத் – விருதுக்கான ஒரு படைப்பு.