கர்நாடகாவில் அதிகார பலத்தை தாண்டி காங்கிரஸ் கட்சி வெற்றி: பதவியேற்பு விழாவில் ராகுல்காந்தி பேச்சு

பெங்களூரு, பா.ஜ.க.வின் பணம், செல்வாக்கு, அதிகாரபலத்தை தாண்டி கர்நாடக மாநிலத்தில் காங்கிரஸ் மகத்தான வெற்றி பெற்றுள்ளது என்று காங்கிரஸ் கட்சியின் முன்னாள் தலைவர் ராகுல் காந்தி கூறியுள்ளார்.

கர்நாடகத்தின் 24-வது முதல்வராக சித்தராமையா நேற்று பதவியேற்றுக் கொண்டார். அவருடன் துணை முதல்வராக டி.கே.சிவகுமார் பதவிப் பிரமாணம் எடுத்துக் கொண்டார்.  முதல்வர் பதவியேற்பு விழாவில் கலந்து கொண்ட ராகுல் காந்தி, நிகழ்ச்சியின் நிறைவில் உரையாற்றினார். அப்போது, கர்நாடக முதல்வர் பதவியேற்பு விழாவில் பங்கேற்ற தலைவர்களுக்கு நன்றி தெரிவித்துக் கொண்டார்.

தொடர்ந்து பேசிய ராகுல் காந்தி, இனி கர்நாடகத்தில் மகளிர் பேருந்தில் இலவசமாக பயணிக்கலாம்.  வாக்குறுதிப்படி, கர்நாடக மக்களுக்கு இலவசமாக 200 யூனிட் மின்சாரம் வழங்கப்படும். காங்கிரஸ் தலைமையிலான அரசு, மக்களின் அனைத்துக் கோரிக்கைகளையும் நிறைவேற்றும் என்றும் ராகுல் கூறினார்.

கர்நாடகா மாநில மக்களுக்கும் காங்கிரஸ் கட்சி தனது நன்றியினைத் தெரிவித்துக்கொள்கிறது. பா.ஜ.க.வின் பணம், செல்வாக்கு, அதிகாரபலத்தை தாண்டி கர்நாடக மாநிலத்தில் காங்கிரஸ் மகத்தான வெற்றி பெற்றுள்ளது  கர்நாடகாவில் காங்கிரஸ் வெற்றி பெற்ற பின் ஊடகங்கள் இந்த வெற்றியைப் பற்றி பல விதமாக எழுதின. பல்வேறு விவாதங்கள் நடைபெற்றன. காங்கிரஸ் கட்சி எவ்வாறு வெற்றி பெற்றது என்று நான் உங்களுக்குச் சொல்கிறேன். 

இந்த வெற்றிக்கு வித்திட்டது ஒரே ஒரு காரணம்தான் உள்ளது. ‘நாங்கள் ஏழைகள் பக்கம், தலித்துகள் பக்கம், ஆதிவாசிகள் பக்கம், பிற்படுத்தப்பட்டவர்கள் பக்கம் நின்றோம். எங்களிடம் உண்மை இருந்தது’ என்பதே அந்த ஒற்றைக் காரணம். பா.ஜ.க.விடம் பணம், போலீஸ் மற்றவை இருந்தன. ஆனால், கர்நாடகா மக்கள் அவர்களின் எல்லா அதிகாரங்களையும் தகர்த்தெறிந்துள்ளனர்.

நாங்கள் உங்களுக்கு 5 வாக்குறுதிகள் கொடுத்திருக்கிறோம். காங்கிரஸ் பொய்யான வாக்குறுதிகளைத் தராது என்று கூறியிருந்தோம். நாங்கள் கூறியதைக் கண்டிப்பாக நிறைவேற்றுவோம். இந்த அரசின் முதல் அமைச்சரவைக் கூட்டம் விரைவில் நடைபெறும். அந்தக் கூட்டத்தில் இந்த 5 வாக்குறுதிகளும் சட்டமாக்கப்படும். நாங்கள் உங்களுக்கு தூய்மையான, ஊழலற்ற ஆட்சியை வழங்குவோம்" என்று அவர் தெரிவித்தார்.