பராமரிப்பு பணி காரணமாக பாலக்காடு-திருச்சி எக்ஸ்பிரஸ் ரயில் சேவைகளில் மாற்றம்

சென்னை, பராமரிப்பு பணிக்காக பாலக்காடு டவுன்- திருச்சி எக்ஸ்பிரஸ் ரயில் சேவைகளில் நேற்று மாற்றம் செய்யப்பட்டுள்ளது.

திருச்சி ரயில்வே கோட்டம் வெளியிட்டுள்ள செய்திக்குறிப்பில் கூறப்பட்டிருப்பதாவது:- தெற்கு ரயில்வேயின் சேலம் கோட்டத்தில் நடைபெறும் பல்வேறு பொறியியல் பணிகள் காரணமாக ஈரோடு -திருச்சி பாசஞ்சர் ரயில் (வண்டி எண்: 56106) இன்று (வெள்ளிக்கிழமை) ஈரோடு ஜங்ஷன் ரயில் நிலையத்தில் இருந்து காலை 8.10 மணிக்கு புறப்பட்டு கரூரில் நிறுத்தப்படும். இந்த ரயில் ஈரோடு- கரூர் இடையே மட்டுமே இயக்கப்படும். கரூர் -திருச்சி இடையே பகுதியாக ரத்து செய்யப்படுகிறது. பாலக்காடு டவுன்- திருச்சி எக்ஸ்பிரஸ் ரயில் (வண்டி எண்: 16844) இன்று (வெள்ளிக்கிழமை) பாலக்காடு டவுன் ரயில் நிலையத்தில் இருந்து காலை 6.30 மணிக்கு புறப்பட்டு குளித்தலை ரயில் நிலையத்தில் நிறுத்தப்படும். இந்த ரயிலானது பாலக்காடு- குளித்தலை இடையே மட்டுமே இயக்கப்படும். குளித்தலை -திருச்சி இடையே பகுதியாக ரத்து செய்யப்படுகிறது. 

திருச்சி ஜங்ஷன் ரயில் நிலையத்தில் இருந்து வழக்கமாக மதியம் 1 மணிக்கு புறப்படும் திருச்சி - பாலக்காடு டவுன் எக்ஸ்பிரஸ் ரயில் (வண்டி எண்: 16843) இன்று (வெள்ளிக்கிழமை) திருச்சி - கரூர் இடையே பகுதியாக ரத்து செய்யப்படும். இந்த ரயிலானது கரூர் ரயில் நிலையத்தில் இருந்து பிற்பகல் 2.20 மணிக்கு புறப்பட்டு செல்லும். திருச்சி கோட்டத்தில் திருவாரூர்- கொரடாச்சேரி இடையே நடந்து வரும் பராமரிப்பு பணிகள் காரணமாக திருச்சி- காரைக்கால் டெமு ரயில் (வண்டி எண்: 76820) இன்று (வெள்ளிக்கிழமை) மற்றும் 3,4-ந் தேதிகளில் திருச்சியில் இருந்து காலை 8.35 மணிக்கு புறப்பட்டு திருவாரூரில் நிறுத்தப்படும். இந்த ரயிலானது திருச்சி- திருவாரூர் இடையே மட்டுமே இயக்கப்படும். காரைக்காலில் இருந்து வழக்கமாக பிற்பகல் 2.55 மணிக்கு புறப்படும் காரைக்கால்- திருச்சி டெமு ரயில் (வண்டி எண்:16819) இன்று (வெள்ளிக்கிழமை) மற்றும் 3,4-ந் தேதிகளில் காரைக்காலில் இருந்து திருவாரூர் வரை பகுதியாக ரத்து செய்யப்படும். இந்த ரயிலானது திருவாரூரில் இருந்து திருச்சிக்கு மாலை 4.15 மணிக்கு புறப்படும். இவ்வாறு அதில் கூறப்பட்டுள்ளது.