புதுடெல்லி : இந்தியா - சீன ராணுவத்தின் கமாண்டர்கள் மட்டத்திலான பேச்சுவார்த்தை இன்று (ஜூலை 14) நடைபெறுகிறது.
லடாக்கின் கிழக்கே உள்ள சுஷூல் பகுதியில் நடக்கும் இந்த பேச்சுவார்த்தையில், எல்லை கட்டுப்பாட்டு கோட்டு பகுதியில் இருந்து இரண்டாவது கட்டமாக படைகளை விலக்கி கொள்வது குறித்த விஷயங்கள் இடம்பெறும் என இந்திய ராணுவ வட்டாரங்கள் தெரிவித்துள்ளன.
எல்லை கட்டுப்பாட்டு கோட்டு பகுதியில் பதற்றத்தை குறைக்கவும், படைகளை வாபஸ் பெறுவது குறித்தும் இந்தியா மற்றும் சீன ராணுவ மற்றும் தூதரக அதிகாரிகள் தொடர்ந்து பேச்சுவார்த்தை நடத்துவார்கள் என இந்திய வெளியுறவு அமைச்சகம் தெரிவித்திருந்தது குறிப்பிடத்தக்கது. எல்லையில் நடந்த மோதலை தொடர்ந்து, ஏற்பட்ட பதற்றத்தை குறைப்பதற்காக இரு நாட்டு ராணுவ அதிகாரிகள் பேச்சுவார்த்தை நடத்தினர்.
மேலும், தேசிய பாதுகாப்பு ஆலோசகர் அஜித் தோவல், சீன வெளியுறவு அமைச்சருடன் பேச்சு நடத்தினார். இதில், பதற்றத்தை தவிர்க்க, இரு தரப்பும், சர்ச்சைக்குரிய பகுதிகளில் இருந்து வாபஸ் பெறுவது என, முடிவு செய்யப்பட்டது.
இதையடுத்து, லடாக் அருகில், சீன வீரர்களும், நம் வீரர்களும், தங்கள் நிலைகளில் இருந்து, 1.5 கி.மீ., பின்வாங்கிச் சென்றதாக ஏற்கனவே தகவல் வெளியானது. மேலும், இரு தரப்பும், லடாக் பகுதியிலிருந்து, 600 மீட்டர் வரை மட்டுமே பின்வாங்கிச் சென்றதாக, நேற்று முன்தினம் ராணுவ வட்டாரங்கள் தெரிவித்தன.
