ஷிண்டே எந்த இலாக்காவும் கேட்கவில்லை: வரும் 16-ம் தேதி மகராஷ்டிர அமைச்சரவை விரிவாக்கம் முதல்வர் பட்னாவிஸ் தகவல்

மும்பை: ஏக்நாத் ஷிண்டே எந்த இலாக்காவும் கேட்கவில்லை என்றும், வரும் 16-ம் தேதி அமைச்சரவை விரிவாக்கம் செய்யப்படும் என்றும் மகராஷ்டிர மாநில முதல்வர் பட்னாவிஸ் தெரிவித்தார்.

 மகராஷ்டிராவின் முதல்வராக பா.ஜ.க. வின் தேவேந்திர பட்னாவிஸ் நேற்று முன்தினம் பதவியேற்றார். சிவசேனாவின் ஏக்நாத் ஷிண்டே, தேசியவாத காங்கிரசின் அஜித் பவார் துணை முதல்வர்களாக பதவியேற்றனர். 

இந்த நிலையில் செய்தி நிறுவனம் ஒன்றுக்கு முதல்வர் பட்னாவில் அளித்த பேட்டியில், 

பா.ஜ.க. வை சேர்ந்தவர் தான் முதல்வர் என்பதை முதல் சந்திப்பிலேயே ஏக்நாத் ஷிண்டே ஏற்றுக் கொண்டார். சிவசேனா கட்சி தலைவர்கள் சிலர் தங்கள் கட்சியில் இருந்து முதல்வர் வர வேண்டும் என விரும்பினர். 

நாங்கள் பா.ஜ.க. வை சேர்ந்தவர் தான் முதல்வர் என்பதில் திட்டவட்டமாக இருந்தோம். தனிப்பட்ட முறையில் ஷிண்டேவுடன் எனக்கு நல்லுறவு உள்ளது. ஏக்நாத் ஷிண்டே எந்த இலாக்காவும் கேட்கவில்லை. வரும் 16-ம் தேதி அமைச்சரவை விரிவாக்கம் செய்யப்படும்.

உள்துறை எப்பொழுதும் பா.ஜ.க.வசம் தான் இருக்கும். கிட்டத்தட்ட அனைத்து துறைகளிலும் நாங்கள் ஒருமித்த கருத்தை எட்டி உள்ளோம். பிரிவினைவாத அரசியலை மக்கள் நிராகரித்தனர். 

இலவச மின்சாரம், கல்வி போன்ற நல்ல திட்டங்களால் மகராஷ்டிராவில் மீண்டும் பா.ஜ.க. ஆட்சி அமைந்தது. இது தான் பா.ஜ.க. மிகப்பெரிய கட்சியாக உருவானதற்கு காரணம். முழு மனதுடன் மக்கள் என்னை ஏற்றுக் கொண்டனர். இவ்வாறு அவர் கூறினார்.