அப்துல் கலாமுக்கு சரத் யாதவ் கண்டனம்

புதுடெல்லி, ஜூலை.- 2 - பிரதமராக சோனியா காந்தியை பதவியேற்பு செய்து வைக்க தாம் தயாராக இருந்ததாக முன்னாள் குடியரசுத் தலைவர் டாக்டர்.அப்துல்கலாம் தமது புத்தகத்தில் எழுதியிருப்பதை குறித்து ஐக்கிய ஜனதா தளத் தலைவர் சரத் யாதவ் விமர்சித்துள்ளார். முன்னாள் குடிரசு தலைவர் அப்துல் கலாம் எழுதியுள்ள டர்னிங் பாயிண்ட்ஸ் என்ற புத்தகத்தில் 2004-ம் ஆண்டு சோனியா பிரதமராக பதவியேற்க பலரும் எதிர்ப்புத் தெரிவித்திருந்த நிலையில் அவருக்கு பதவியேற்பு செய்து வைக்க தாம் தயாராக இருந்தேன் என்று அப்துல் கலாம் குறிப்பிட்டுள்ளார். இதனை விமர்சித்துள்ள ஐக்கிய ஜனதா தளத் தலைவர் சரத் யாதவ், 8 ஆண்டுகளாக மவுனம் காத்து வந்த அப்துல் கலாம் தற்போது இப்படி பேசியிருப்பது சுயநலத்தை அதிகரித்துக் கொள்ளத்தான் என்று கூறியுள்ளார். குடியரசுத் தலைவர் பதவி போன்ற பெரிய பொறுப்புகளில் இருப்பவர் நேர்மையுடன் நடந்து கொள்ள வேண்டும். இதுவரை கலாம் மீது இருந்த மரியாதை போய்விட்டது என்று சரத் யாதவ் தெரிவித்துள்ளார். வருகின்ற குடியரசுத் தலைவர் தேர்தலில் காங்கிரஸ் வேட்பாளர் பிரணாப் முகர்ஜிக்கு, சரத் யாதவ் ஆதரவு தெரிவித்துள்ள நிலையில் இக்கருத்தை தெரிவித்திருப்பது குறிப்பிடத்தக்கது.