புதுடெல்லி : கொரோனா பெருந்தொற்று பரவல் அதிகரிப்பால் ஒடிசாவில் அறிவிக்கப்பட்ட 14 நாள் ஊரடங்கு நேற்று முதல் அமலுக்கு வந்தது.
ஒடிசா மாநிலத்தில் கொரோனா பெருந்தொற்றால் பாதிக்கப்படுபவர்களின் எண்ணிக்கை நாளுக்கு நாள் அதிகரித்துக் கொண்டே செல்கிறது. தொற்று பரவலைக் கட்டுப்படுத்த அம்மாநிலத்தில் 2-வாரங்களுக்கு ஊரடங்கு அமல்படுத்தப்பட இருப்பதாக அண்மையில் அம்மாநில முதல்வர் நவீன் பட்நாயக் தெரிவித்தார்.
இதன்படி, நேற்று முதல் ஊரடங்கு அமலுக்கு வந்தது. இந்த ஊரடங்கானது வரும் 19-ம் தேதி வரை அமலில் இருக்கும். கடும் கட்டுப்பாடுகளுடன் வார நாட்களில் போக்குவரத்து சிலவற்றுக்கு விதிவிலக்கு அளிக்கப்பட்டுள்ளது. ஆனால், சனி, ஞாயிற்றுக் கிழமைகளில் முழு ஊரடங்கு அமலில் இருக்கும் என்று தெரிவிக்கப்பட்டுள்ளது. மளிகைக் கடைகள், இறைச்சிக் கடைகள் மட்டும் திறக்க அனுமதி அளிக்கப்பட்டுள்ளது.
