கொழும்பு : இலங்கையில் அதிபர் தேர்தலையையொட்டி வாக்காளர்களை ஏற்றி வந்த பேருந்து மீது துப்பாக்கிச் சூடு நடத்தப்பட்டிருப்பது பெரும் பதற்றத்தை ஏற்படுத்தியுள்ளது.

இதுகுறித்து இலங்கை ஊடகங்கள் தரப்பில் கூறப்பட்டிருப்பதாவது,

இலங்கையின் வடக்குப் பகுதியில் உள்ள தீவுப் பகுதியான மன்னாரில் அதிபர் தேர்தலில் வாக்களிப்பதற்காக வாக்காளர்களை ஏற்றி வந்த பேருந்து மீது துப்பாக்கி ஏந்திய நபர் கண்மூடித்தனமாக துப்பாக்கிச் சூடு நடத்தியுள்ளார். இந்தத் தாக்குதலில் ஏற்பட்ட பாதிப்புகள் குறித்த முழு விவரம் இல்லை. மேலும் தாக்குதல் நடத்தியவர் சாலையில் வாகனங்களின் டயர்களையும் எரித்துள்ளார் என்று தெரிவிக்கப்பட்டுள்ளது. வாக்காளர்களை ஏற்றி வந்த பேருந்து மீது துப்பாக்கிச் சூடு நடத்தப்பட்டுள்ளதால் அப்பகுதியில் பதற்றம் நிலவி வருகிறது. இலங்கையின் 8-வது அதிபரைத் தேர்ந்தெடுக்க நேற்று வாக்குப் பதிவு நடைபெற்றது. இதனால் அந்நாடு முழுவதும் பலத்த பாதுகாப்பு ஏற்பாடுகள் செய்யப்பட்டிருந்தன.