கொரோனா பரவலைக் கட்டுப்படுத்தும் வகையில் நாடு முழுக்க ஊரடங்கு உத்தரவு அமல்படுத்தப்பட்டிருந்தாலும், நாட்டில் பணப்புழக்கம் இருப்பதை உறுதி செய்யுமாறு வங்கிகளிடம் வலியுறுத்தப்படும் என்று மத்திய நிதியமைச்சர் நிர்மலா சீதாராமன் கூறியுள்ளார்.
அதே சமயம், மாநில அரசுகளும், வங்கிப் பணம் வாகனங்கள் மூலம் எடுத்துச் செல்லப்படுவதற்கு முழு ஒத்துழைப்பு வழங்கவும் அறிவுறுத்தப்படும் என்றும் நிர்மலா சீதாராமன் தெரிவித்துள்ளார். வங்கி மற்றும் ஏ.டி.எம்.கள் மூலம் மக்களுக்குத் தேவையான பணம் உரிய நேரத்தில் கிடைக்க வங்கிகள் உறுதி செய்யும் வகையில் வங்கிகளுக்கு அறிவுறுத்தல் செய்யப்படும் என்றும் மத்திய அமைச்சர் தெரிவித்துள்ளார். அதே சமயம், வங்கிகளுக்கு வரும் வாடிக்கையாளர்களும் உரிய இடைவெளியை பின்பற்றுமாறும், வங்கிப் பணிகளை டிஜிட்டல் முறையில் செய்யுமாறும் தொடர்ந்து பொதுமக்களுக்கு வலியுறுத்தப்பட்டு வருவது குறிப்பிடத்தக்கது.
