திருமூர்த்தி அணையில் இருந்து இன்று முதல் தண்ணீர் திறக்க அரசு உத்தரவு

சென்னை : திருப்பூர் மாவட்டம் திருமூர்த்தி அணையில் இருந்து இன்று முதல் தண்ணீர் திறக்க அரசு உத்தரவிட்டுள்ளது. 

இது குறித்து நீர்வளத்துறை அரசு கூடுதல் தலைமை செயலாளர் விடுத்துள்ள செய்திக்குறிப்பில் கூறப்பட்டுள்ளதாவது, 

திருப்பூர் மாவட்டம், திருமூர்த்தி அணையிலிருந்து, பரம்பிக்குளம்   ஆழியாறு திட்டத்தில், பாலாறு பழைய ஆயக்கட்டுப் பாசனமான தளி வாய்க்கால் பாசனத்திற்கு   20.09.2023 முதல் 31.12.2023 முடிய,  ஒரு நிரப்பிற்கு, நீரிழப்பு உட்பட,  மொத்தம்   250  மில்லியன் கன அடிக்கு மிகாமல் தண்ணீர்  திறந்துவிட  விட அரசு  ஆணையிட்டுள்ளது.  இதனால், திருப்பூர் மாவட்டம், உடுமலை வட்டத்திலுள்ள 2786 ஏக்கர் நிலங்கள் பாசன வசதி பெறும் என்று கூறப்பட்டுள்ளது. 

அவர் விடுத்துள்ள மற்றொரு செய்திக்குறிப்பில்,  திருப்பூர் மாவட்டம், திருமூர்த்தி அணையிலிருந்து, பாலாறு படுகை நான்காம் மண்டலப் பாசனப் பகுதிகளுக்குட்பட்ட நிலங்களில், நிலையிலுள்ள பயிர்களைக் காப்பாற்றவும் மற்றும் கால்நடைகளின் குடிநீர் தேவைக்காகவும் 20.09.2023 முதல் 11.10.2023 முடிய 21 நாட்களுக்குள், ஒரு சுற்றுக்கு, மொத்தம் 2000 மில்லியன் கன அடிக்கு மிகாமல் (நீரிழப்பு உட்பட), தண்ணீர் திறந்து விட அரசு ஆணையிட்டுள்ளது.  இதனால், கோயம்புத்தூர் மற்றும் திருப்பூர் மாவட்டங்களிலுள்ள 94068 ஏக்கர் நிலங்கள் பாசன வசதி பெறும் என்று கூறப்பட்டுள்ளது.