தமிழகத்திற்கான கல்வி நிதியை மத்திய அரசு ஒதுக்காதது ஏன்..? சென்னை உயர்நீதிமன்றம் கேள்வி

சென்னை: தமிழ்நாட்டிற்கான கல்வி நிதியை மத்திய அரசு ஒதுக்காதது ஏன்?" என்று ஐகோர்ட்டு கேள்வி எழுப்பியுள்ளது. 

கட்டாயக் கல்வி உரிமைச் சட்டத்தின் கீழ் தனியார் பள்ளிகளில் ஏழை மாணவர்களுக்கு 25 சதவீத  இடஒதுக்கிட்டிற்கான மாணவர் சேர்க்கை நடப்பு கல்வி ஆண்டில் இதுவரை தொடங்கவில்லை என்று கூறி கோவையை சேர்ந்த மறுமலர்ச்சி இயக்கம் என்ற அமைப்பின் நிர்வாகி ஈஸ்வரன் என்பவர் சென்னை ஐகோர்ட்டில் வழக்கு தொடர்ந்திருந்தார். இந்த வழக்கு நீதிபதி ஜி.ஆர்.சுவாமிநாதன், நீதிபதி லட்சுமி நாராயணன் ஆகியோர் அடங்கிய அமர்வில் நேற்று விசாரணைக்கு வந்தது.

அப்போது தமிழக அரசு தரப்பில் ஆஜரான கூடுதல் தலைமை வழக்கறிஞர் ரவீந்திரன், "கல்வி உரிமைச் சட்டத்தின் கீழ் 25 சதவீத இடஒதுக்கீட்டிற்கான மாணவர்களின் கல்வி கட்டணத்தில் 60 சதவீதத்தை மத்திய அரசும், 40 சதவீதத்தை மாநில அரசும் வழங்குகிறது. ஆனால் மத்திய அரசு 2021-ம் ஆண்டு முதல் 2023-ம் ஆண்டு வரை எந்தவித நிதியும் ஒதுக்கவில்லை. இந்த ஆண்டுகளில் 100 சதவீத நிதியையும் மாநில அரசே ஒதுக்கியுள்ளது என்று தெரிவித்தார்.

இதை பதிவு செய்து கொண்ட நீதிபதி, "தமிழ்நாட்டிற்கான கல்வி நிதியை மத்திய அரசு ஒதுக்காதது ஏன்?" என்று கேள்வி எழுப்பினார். இதற்கு மத்திய அரசு தரப்பில் ஆஜரான வழக்கறிஞர், "அனைத்து மாநிலங்களுக்கும் நிதி ஒதுக்கப்பட்டுள்ளது. சில காரணங்களால் தமிழ்நாட்டிற்கு நிதி ஒதுக்கப்படவில்லை" என்று தெரிவித்தார். அப்போது, "என்ன காரணத்திற்காக நிதி ஒதுக்கப்படவில்லை?" என  கேள்வி எழுப்பிய நீதிபதிகள்,  தமிழ்நாட்டிற்கு ஒதுக்க வேண்டிய நிதி எவ்வளவு என்பது குறித்த விவரங்களை நாளை (இன்று) சமர்ப்பிக்க வேண்டும் என மத்திய அரசு தரப்புக்கு உத்தரவிட்டு, வழக்கின் விசாரணையை  இன்றைக்கு ஒத்திவைத்தனர்.