ஊட்டி ரோஜா பூங்காவில் கவாத்து செய்யும் பணி கலெக்டர் சங்கர் தொடங்கி வைத்தார்

ஊட்டி ரோஜா பூங்காவில் ரோஜா செடிகளை கவாத்து செய்யும் பணியினை மாவட்ட கலெக்டர் முனைவர் பொ.சங்கர் தொடங்கி வைத்து கூறியதாவது-

                                       30,000 ரோஜா செடிகள்

ஊட்டி ரோஜா பூங்காவில் நடவு செய்யப்பட்டுள்ள ரோஜா ரகங்கள் உலகின் பல்வேறு பகுதிகளிலிருந்து சேகரிக்கப்பட்டு பராமரிக்கப்பட்டு வருகிறது. தற்போது 4000 வீரியரக ரோஜா ரகங்களில் சுமார் 30,000 ரோஜா செடிகள் நடவு செய்யப்பட்டு பராமரிக்கப்பட்டு வருகிறது. உலக பிரசித்தி பெற்ற ரோஜா பூங்காவில் இந்தாண்டு மே மாதத்தில் நடைபெறும் 15_வது ரோஜா கண்காட்சியை முன்னிட்டு அரசு ரோஜா பூங்காவில் பராமரிக்கப்பட்டு வரும் சுமார் 30 ஆயிரம் வீரியரக ரோஜா ஒட்டுச்செடிகளில் முதல் கட்டமாக கவாத்து செய்யும் பணி துவங்கப்பட்டுள்ளது. கவாத்து செய்த ரோஜா செடிகளில் ஏப்ரல் முதல் வாரத்திலிருந்து ரோஜா மலர்கள் பூத்துக்குலுங்கி சுற்றுலாப பயணிகளின் கண்களுக்கு விருந்தாக அமையும் என்றார்.

இந்நிகழ்ச்சியில் தோட்டக்கலை இணை இயக்குநர் மணி, துணை இயக்குநர் உமாராணி, உதவி இயக்குநர் மீராபாய் மற்றும் தோட்டக்கலை அலுவலர்கள் உடனிருந்தனர்.