இங்கி.க்கு எதிரான கடைசி டெஸ்ட்: தொடரை வென்று சரித்திரம் படைக்குமா இந்திய அணி ? மான்செஸ்டரில் இன்று தொடக்கம்

லண்டன்: 14 ஆண்டுகளுக்கு பிறகு விராட்கோலி தலைமையிலான அணி இங்கிலாந்து மண்ணில் டெஸ்ட் தொடரை கைப்பற்றி புதிய சரித்திரம் படைக்குமா ? என்று ரசிகர்கள் ஆர்வத்தில் உள்ளனர்.

சுற்றுப்பயணம்... 

விராட் கோலி தலைமையிலான இந்திய கிரிக்கெட் அணி இங்கிலாந்தில் சுற்றுப்பயணம் செய்து விளையாடி வருகிறது. இரு அணிகள் இடையேயான 5 டெஸ்ட் தொடரில் நாட்டிங்காமில் நடந்த முதல் டெஸ்ட் டிரா ஆனது. லண்டன் லார்ட்ஸ் மைதானத்தில் நடைபெற்ற 2-வது டெஸ்டில் 151 ரன் வித்தியாசத்திலும், ஓவலில் நடந்த 4-வது டெஸ்டில் 157 ரன் வித்தியாசத்திலும் இந்தியா வெற்றி பெற்றது.

இன்று தொடக்கம்...

லீட்சில் நடந்த 3-வது டெஸ்டில் இங்கிலாந்து இன்னிங்ஸ் மற்றும் 76 ரன் வித்தியாசத்தில் வென்றது. இதனால் இந்தியா 2-1 என்ற கணக்கில் முன்னிலையில் உள்ளது. இந்தியா-இங்கிலாந்து அணிகள் மோதும் 5-வது மற்றும் கடைசி டெஸ்ட் போட்டி மான்செஸ்டரில் இன்று தொடங்குகிறது.

கைப்பற்றுமா ?

இந்த டெஸ்டிலும் வெற்றி பெற்று இந்தியா 3-1 என்ற கணக்கில் தொடரை கைப்பற்றுமா? என்று இந்திய ரசிகர்களால் ஆவலுடன் எதிர்பார்க்கப்படுகிறது. கடந்த டெஸ்டில் முதல் இன்னிங்சில் பின் தங்கி இருந்து பெற்ற வெற்றி மிகவும் முக்கியத்துவம் வாய்ந்தது.

டிரா செய்தாலே...

கடைசி டெஸ்டை டிரா செய்தாலே இந்தியா தொடரை கைப்பற்றிவிடும். இங்கிலாந்து மண்ணில் இதற்கு முன்பு 3 தடவை இந்தியா டெஸ்ட் தொடரை வென்று இருந்தது. 1971-ல் அஜித் வடேகர் தலைமையிலான அணி 1-0 (3 டெஸ்ட்) என்ற கணக்கிலும், 1986-ல் கபில்தேவ் தலைமையிலான அணி 2-0 (3) என்ற கணக்கிலும், 2007-ல் ராகுல் டிராவிட் தலைமையில் 1-0 என்ற கணக்கிலும் (3) கைப்பற்றி இருந்தது.

புதிய சரித்திரம்... 

14 ஆண்டுகளுக்கு பிறகு விராட்கோலி தலைமையிலான அணி இங்கிலாந்து மண்ணில் டெஸ்ட் தொடரை கைப்பற்றி புதிய சரித்திரம் படைக்கும் ஆர்வத்தில் உள்ளது. இந்திய அணியின் பேட்டிங்கில் தற்போது ரகானே மட்டுமே மோசமான நிலையில் உள்ளார். இதனால் அவர் இந்த டெஸ்டில் நீக்கப்படும் நிலையில் உள்ளார். வெற்றி அணி என்பதால் கோலி அதில் மாற்றம் செய்ய மாட்டார் என்ற கருத்து நிலவுகிறது.

அஸ்வின் - ஜடேஜா...

அஸ்வினுக்கு இதுவரை வாய்ப்பு வழங்கப்படவில்லை. இந்த டெஸ்டிலாவது அவருக்கு வாய்ப்பு வழங்கப்பட வேண்டும் என்ற விவாதம் அதிகமாக எழுந்து வருகிறது. ஒருவேளை அஸ்வினுக்கு வாய்ப்பு வழங்கப்பட்டால் ஜடேஜா நீக்கப்படலாம். ரோகித்சர்மா ஒரு சதம், 2 அரை சதத்துடன் 368 ரன்னும், ராகுல் ஒரு சதம், ஒரு அரை சதத்துடன் 315 ரன்னும் எடுத்து உள்ளனர். பந்து வீச்சில் பும்ரா 18 விக்கெட்டும், சிராஜ் 14 விக்கெட்டும் கைப்பற்றி உள்ளனர்.

கட்டாயத்தில் இங்கி...

ஜோரூட் தலைமையிலான இங்கிலாந்துஅணிக்கு இந்தடெஸ்டில் வெற்றி பெற வேண்டும் என்ற கட்டாயம் உள்ளது. டிரா செய்தாலோ, தோற்றாலோ தொடரை இழந்து விடும். இதனால் தொடரை சமன் செய்ய அந்தஅணி வீரர்கள் வெற்றி பெற கடுமையாக போராடுவார்கள். ஜோரூட் 3 சதம், ஒரு அரை சதத்துடன் 564 ரன்கள் குவித்து உள்ளார். அவர் ஒருவரே அணியின் மிகப்பெரிய பலமாக இருக்கிறார்.

131-வது டெஸ்ட்...

இரு அணிகளும் இன்று மோதுவது 131-வது டெஸ்ட் ஆகும். இதுவரை 130 போட்டியில் இந்தியா 31-ல், இங்கிலாந்து 49-ல் வெற்றி பெற்று உள்ளன. 50 டெஸ்ட் டிரா ஆனது. இந்த போட்டி இந்திய நேரப்படி மாலை 3.30 மணிக்கு தொடங்குகிறது. சோனி சேனல்களில் நேரடியாக ஒளிபரப்பு செய்யப்படுகிறது. 

BOX - 1

மேலும் ஒருவருக்கு....

ரவி சாஸ்திரி உள்பட 3 பயிற்சியாளர்களுக்கு அடுத்ததாக இந்திய அணியைச் சேர்ந்த மேலும் ஒரு நபருக்கு கொரோனா பாதிப்பு ஏற்பட்டுள்ளது. இந்நிலையில் நேற்று இந்திய அணியைச் சேர்ந்த அனைவருக்கும் கொரோனா பரிசோதனை மேற்கொள்ளப்பட்டது. இதில் ஒருவருக்கு கொரோனா உறுதியாகியுள்ளது. இதையடுத்து இந்திய அணியினரின் நேற்றைய பயிற்சி ரத்து செய்யப்பட்டது. 

இந்திய வீரர்கள் அனைவரும் தங்கும் விடுதியில் தொடர்ந்து இருக்க அறிவுறுத்தப் பட்டுள்ளனர். இந்திய அணி ஊழியர்களில் ஒருவருக்கு கொரோனா உறுதியானதால் நேற்று இந்திய அணியைச் சேர்ந்த அனைவரும் மீண்டும் கொரோனா பரிசோதனை மேற்கொண்டுள்ளார்கள். இதன் முடிவு வந்த பிறகு அடுத்தக்கட்ட நடவடிக்கை குறித்து தெரிவிக்கப்படும். இதனால் 5-வது டெஸ்ட் திட்டமிட்டபடி நடக்குமா என்கிற சந்தேகம் எழுந்துள்ளது.

BOX - 2

ஐ.பி.எல்.லுக்கு பாதிப்பு

இந்திய அணி வீரர்களில் யாருக்காவது கொரோனா பாதிப்பு ஏற்பட்டால் அது செப்டம்பர் 19 முதல் தொடங்கவுள்ள ஐபிஎல் போட்டியையும் பாதிக்கும் எனத் தெரிகிறது. 5-வது டெஸ்ட் முடிந்த பிறகு ஐபிஎல் போட்டியில் பங்கேற்பதற்காக செப்டம்பர் 15 அன்று மான்செஸ்டரிலிருந்து துபைக்கு இந்திய வீரர்கள் செல்லவுள்ளார்கள்.