திருவனந்தபுரம் : கேரளாவில் 18 வயதுக்கு மேற்பட்டவர்களில் 90 சதவீதம் பேருக்கு முதல் தவணை தடுப்பூசி செலுத்தப்பட்டுள்ளது என, மாநில சுகாதாரத்துறை அமைச்சர் வீணா ஜார்ஜ் தெரிவித்துள்ளார்.
நாடு முழுவதும் கோவிட் பெருந்தொற்றின் பரவலைக் கட்டுப்படுத்த தடுப்பூசி இயக்கம் தீவிரப்படுத்தப்பட்டு வருகிறது. இருந்தும் கேரளாவில் கோவிட் பாதிப்பு குறைந்தபாடில்லை. இந்நிலையில், கேரள சுகாதாத்துறை அமைச்சர் வீணா ஜார்ஜ் கூறியதாவது,
கேரளத்தில் தற்போது கோவிட் தொற்றால் பாதிக்கப்பட்டு 1,67,008 பேர் சிகிச்சை பெற்று வருகின்றனர். நேற்று முன்தினம் புதிதாக 15,692 பேருக்கு தொற்று கண்டறியப்பட்டுள்ளது. 92 பேர் பலியாகினர். மொத்தமாக உயிரிழந்தோர் எண்ணிக்கை 23,683 ஆக அதிகரித்துள்ளது.
கேரளாவில் கோவிட் பரவலைக் கட்டுப்படுத்த மாநில அரசு அனைத்து வகையான நடவடிக்கைகளையும் எடுத்து வருகிறது. அந்த வகையில், கேரளாவில் தடுப்பூசி செலுத்திக்கொள்ள தகுதியானவர்களில் 90 சதவீதம் பேருக்கு முதல் தவணை தடுப்பூசி; ஒரு கோடிக்கும் அதிகமானோருக்கு இரண்டு தவணை தடுப்பூசிகளும் செலுத்தப்பட்டு விட்டன. 100 சதவீத தடுப்பூசி இலக்கை கேரள அரசு விரைவில் எட்டும் என்று அவர் தெரிவித்தார்.
