ஈராக்கில் பாடலுக்கு நடனம் ஆடியதால் மணமகளை விவாகரத்து செய்த மணமகன்

ஈராக்கில் பாடல் ஒன்றுக்கு மணமகள் நடனம் ஆடியதற்காக திருமணமான சில நாட்களிலேயே மணமகன் அவரை விவாகரத்து செய்தார்.

ஈராக் தலைநகர் பாக்தாத்தில் ஆதிக்கம் நிறைந்த வரிகள் உடைய பாடல் ஒன்றுக்கு நடனம் ஆடியதற்காக மணமகளை, மணமகன் விவாகரத்து செய்திருக்கிறார்.  விவாகரத்து செய்யும் அளவுக்கு அந்தப் பாடலில் என்ன உள்ளது என்று பார்த்தால், மிசீதரா என்ற சிரியா நாட்டின் பாடல்தான். இப்பாடலை லமிஸ் கான் பாடியுள்ளார். அப்பாடலில் நான் ஆதிக்கம் நிறைந்தவள். உன்னைக் கட்டுக்குள் வைப்பேன் என்ற வார்த்தைகள் இடம்பெற்றுள்ளன.

இப்பாடலுக்கு திருமணம் முடிந்த கையோடு நடனம் ஆடியதற்காகத்தான் மணமகள் மீது மணமகனும் அவரது குடும்பத்தினரும் கோபம் அடைந்துள்ளனர். மணமகளின் செயலின் மூலம் தங்கள் குடும்பத்தின் நற்பெயருக்குக் களங்கம் வந்து விட்டதாக மணமகள் வீட்டாரோடு வாக்குவாதம் செய்துள்ளனர்.  இறுதியில் மணப்பெண்ணை மணமகன் விவகரத்து செய்திருக்கிறார். ஈராக்கில் மிக விரைவாக வழங்கப்பட்ட விவாகரத்து வழக்காக இது பார்க்கப்படுகிறது.