அமைச்சர் துரைமுருகனுக்கு திடீர் உடல்நலக்குறைவு : சென்னை அப்பல்லோவில் அனுமதி

சென்னை : திடீர் உடல்நலக்குறைவு ஏற்பட்டதை தொடர்ந்து சென்னை அப்பல்லோ மருத்துவமனையில் அமைச்சர் துரைமுருகன் அனுமதிக்கப்பட்டுள்ளார். அவரது உடல்நிலை குறித்து மருத்துவர்கள் கண்காணித்து வருகின்றனர். 

விக்கிரவாண்டி சட்டமன்ற தொகுதி இடைத்தேர்தலில்  தி.மு.க வேட்பாளர் அன்னியூர் சிவா வெற்றி பெற்றுள்ளார். இதையடுத்து விக்கிரவாண்டி தொகுதியில் பல்வேறு இடங்களில் பட்டாசுகளை வெடித்தும் இனிப்புகள் வழங்கியும் தி.மு.க.வினர் கொண்டாடி வருகிறார்கள். அதே போல அண்ணா அறிவாலயத்திலும் தி.மு.கவினர் கொண்டாட்டத்தில் ஈடுபட்டனர். 

இந்த நிலையில் அண்ணா அறிவாலயத்தில் தி.மு.க. தலைவரும், முதல்வருமான மு.க.ஸ்டாலின் அங்கு திரண்டிருந்த தொண்டர்களுக்கு இனிப்புகள் வழங்கினார். 

இந்த நிலையில் முதல்வர்  மு.க.ஸ்டாலினுடன் சென்னை அண்ணா அறிவாலயம் வந்திருந்த அமைச்சர் துரைமுருகனுக்கு திடீர் உடல்நலக்குறைவு ஏற்பட்டது. இதையடுத்து அவருக்கு முதலுதவி சிகிச்சை அளிக்கப்பட்டது. 

தொடர்ந்து அமைச்சர் துரைமுருகன் சென்னை அப்போலோ மருத்துவமனைக்கு அழைத்துச் செல்லப்பட்டார். அங்கு அவசர சிகிச்சைப் பிரிவில் அமைச்சர் துரைமுருகனை அனுமதித்து மருத்துவர்கள் கண்காணித்து வருகின்றனர்.