பணப்பரிமாற்றத்தில் தயாளு அம்மாளுக்கும் தொடர்பு: அதிகாரி சாட்சியம்

புது டெல்லி - கலைஞர் தொலைக்காட்சி நிறுவனத்துக்கு முறைகேடாக பணப் பரிமாற்றம் நடந்த விவகாரத்தில் திமுக தலைவர் கருணாநிதியின் மனைவி தயாளு அம்மாளுக்கும் தொடர்பு இருப்பதாக மத்திய அமலாக்கத் துறையின் இணை இயக்குனர் ஹிமான்ஷூகுமார் லால் சிறப்பு நீதிமன்றத்தில் தெரிவித்தார்.
2 ஜி வழக்கில் அரசு தரப்பு சாட்சியான அமலாக்க துறை இணை இயக்குனர் ஹிமான்ஷூகுமார் லால் இந்த வழக்கை விசாரிக்கும் சிறப்பு நீதிமன்ற நீதிபதி ஓ.பி. ஷைனி முன்னிலையில் சாட்சியம் அளித்தார். அதில் அவர் கூறியதாவது,
2 ஜி ஊழல் வழக்குடன் சம்பந்தப்பட்ட கலைஞர் தொலைக்காட்சி நிறுவனத்துக்கு முறைகேடாக பணப்பரிமாற்றம் நடந்த விவகாரத்தில் திமுக தலைவர் கருணாநிதியின் மனைவி தயாளு அம்மாளுக்கும் தொடர்பு இருக்கிறது. அவரும் திமுக எம்.பி. கனிமொழியும், கலைஞர் தொலைக்காட்சி நிறுவனத்தில் தங்களுக்கு இருந்த பங்குகளை சினியுக் பிலிம்ஸ் நிறுவனத்துக்கு வழங்க முடிவு செய்திருந்தனர். இதன் வாயிலாக 2 ஜி ஊழல் மூலம் கலைஞர் தொலைக்காட்சி நிறுவனத்துக்கு கிடைத்த முறைகேடான பணத்தை காட்ட அவர்கள் முயன்றனர் என்று தமது சாட்சியத்தில் அவர் தெரிவித்தார்.