திருப்பதியில் 20 மணி நேரம் காத்திருந்து தரிசனம் செய்யும் பக்தர்கள்

திருப்பதி : திருப்பதியில் பக்தர்கள் தரிசனத்திற்கு 20 மணி நேரம் காத்திருக்கும் நிலை ஏற்பட்டுள்ளது.

திருப்பதியில் கடந்த வாரம் ஏழுமலையானை தரிசனம் செய்வதற்காக குறைந்த அளவு பக்தர்கள் வந்தனர். கடந்த 3 நாட்களுக்கு முன் ரத சப்தமி எனும் ஒரு நாள் பிரமோற்சவ விழா நடந்தது. ஒரே நாளில் ஏழு வாகனங்களில் ஏழுமலையான் 4 மாட வீதிகளில் உலா வருவதை காண லட்சக்கணக்கான பக்தர்கள் திருமலையில் குவிந்தனர். இதனால் ஏழுமலையானை தரிசிக்க பக்தர்கள் சுமார் 30 மணி நேரத்திற்கு மேல் காத்திருந்து தரிசனம் செய்தனர்.

இந்த நிலையில் கடந்த 3 நாட்களாக ஏழுமலையானை தரிசனம் செய்வதற்காக வரும் பக்தர்களின் எண்ணிக்கை அதிகரித்து காணப்படுகிறது. பக்தர்களின் கூட்டம் குறையாததால் வைகுந்தம் காம்ப்ளக்சில் அனைத்து அறைகளிலும் பக்தர்கள் நிரம்பி வழிகின்றனர். இதனால் பக்தர்கள் தரிசனத்திற்கு 20 மணி நேரம் காத்திருக்கும் நிலை ஏற்பட்டுள்ளது.