சென்னை : பாராளுமன்ற மக்களவை தேர்தலுக்கான பேச்சு வார்த்தையை இந்திய யூனியன் முஸ்லீம் லீக் கட்சி தி.மு.க.வுடன் தொடங்கி உள்ளது. 

தி.மு.க. பொதுச்செயலாளர் துரைமுருகனுடன் இந்திய யூனியன் முஸ்லீம் லீக் தலைவர் காதர்மொய்தீன் பேச்சுவார்த்தையில் ஈடுபட்டார்.  

வரும் பாராளுமன்ற தேர்தலை எதிர்கொள்ள பிரதான அரசியல் கட்சிகள் தங்கள் தேர்தல் வேலைகளை தற்போதே ஆரம்பித்துள்ளன. இன்னும் 5,6 மாதங்களே உள்ளதால் தேர்தல் கூட்டணி பேச்சுவார்த்தைகள் தேசிய அளவு தொடங்கி, மாநில அளவில் தொடர்ந்து வருகிறது . 

தமிழகத்தை பொறுத்தவரை ஆளும் தி.மு.க. கூட்டணியில் காங்கிரஸ், இடதுசாரிகள், வி.சி.க., ம.தி.மு.க., முஸ்லீம் லீக் உள்ளிட்ட கட்சிகள் இடப்பெற்றுள்ளன. இந்த கட்சிகளுக்கு இடையேயான கூட்டணி பேச்சுவார்த்தையை தி.மு.க. தலைவர்கள் தற்போது தொடங்கி உள்ளனர்.

நேற்று தி.மு.க. தலைமை அலுவலகமான அண்ணா அறிவாலயத்தில் இந்திய முஸ்லீம் லீக் கட்சியை சேர்ந்த நிர்வாகிகள், தி.மு.க. மூத்த நிர்வாகிகளை சந்தித்து பேசியுள்ளனர். கடந்த 2019-ம் ஆண்டு பாராளுமன்ற தேர்தலின் போது தி.மு.க. கூட்டணி கட்சி சார்பாக இந்தியா முஸ்லீம் லீக் கட்சியில் இருந்து நவாஸ் கனி போட்டியிட்டு வெற்றி பெற்றார். இந்த முறை வேலூர் மக்களவை தொகுதி இந்திய முஸ்லீம் லீக் கட்சிக்கு ஒதுக்கப்படலாம் என எதிர்பார்க்கப்படுகிறது.

வரும் வாரங்களில் ம.தி.மு.க, இடதுசாரிகள், வி.சி.க, கொங்கு மக்கள் கட்சி உள்ளிட்ட கட்சிகளுடன் கூட்டணி பேச்சுவார்த்தை நடைபெறும் என எதிர்பார்க்கப்படுகிறது.