யு.பி.எஸ்.சி. சிவில் சர்வீஸ் தேர்வுக்கு விண்ணப்பிக்க கால அவகாசம் நீடிப்பு

புதுடில்லி: யு.பி.எஸ்.சி. சிவில் சர்வீஸ் தேர்வுக்கு விண்ணப்பிக்க கால அவகாசம் பிப்ரவரி 18-ம் தேதி வரை நீட்டிக்கப்பட்டுள்ளது.

ஐ.ஏ.எஸ்., ஐ.பி.எஸ் பணிகளுக்கான யு.பி.எஸ்.சி.  சிவில் சர்வீஸ் தேர்வு மற்றும் ஐப்எஸ் தேர்விற்கான அறிவிப்பு கடந்த ஜனவரி இறுதியில் வெளியானது. இதற்கான விண்ணப்பப் பதிவு நேற்றுடன் (11.02.2025) முடிவடையும் நிலையில், விண்ணப்பிக்க கால அவகாசம் பிப்ரவரி 18-ம் தேதி வரை நீட்டிக்கப்பட்டுள்ளது. முதல்நிலை தேர்விற்கு விண்ணப்பிக்கும் தேர்வர்கள் இந்த வாய்ப்பை பயன்படுத்திக் கொண்டு ஆன்லைன் வழியாக விண்ணப்பிக்கலாம்.

யு.பி.எஸ்.சி.  குடிமை பணிகள் மற்றும் இந்திய வன சேவை தேர்விற்கு விண்ணப்பிக்க விரும்புகிறவர்கள் https://upsconline.gov.in என்ற இணையதளத்தில் ஆன்லைன் வழியாக விண்ணப்பிக்க வேண்டும். இதில் ஓ.டி .ஆர். ப்ரொபைல் பதிவு செய்து, பின்னர் தேர்விற்கு விண்ணப்பிக்க வேண்டும். ஏற்கனவே பதிவு செய்தவர்கள் மீண்டும் பதிவு செய்ய வேண்டிய அவசியம் இல்லை. விண்ணப்பக் கட்டணமாக ரூ.100 செலுத்த வேண்டும். பெண்கள், எஸ்சி/எஸ்டி, மாற்றுத்திறனாளிகள் கட்டணம் செலுத்த வேண்டியது இல்லை.

முதல்நிலை தேர்விற்கு விண்ணப்பிக்கும்போது ஏற்படும் சந்தேகங்களுக்கு நேரடியாக யு.பி.எஸ்.சி. -யை 011-23385271/011-23381125/011-23098543 ஆகிய தொலைப்பேசி எண்களில் வேலை நாட்களில் காலை 10 மணி முதல் மாலை 5 மணி வரை தொடர்புகொள்ளலாம்.