மும்பை, ஆக. - 18 - தொடர்ச்சியாக கிரிக்கெட் போட்டிகளில் விளையாடுவதற்கு உடல் ரீதியாகவும், மன ரீதியாகவும் முழு தகுதியோடு இருக்கிறோம் என்று டோனி தெரிவித்துள்ளார். இன்னும் சில நாட்களில் நியூசிலாந்துக்கு எதிரான டெஸ்ட் போட்டியில் விளையாடவுள்ளது இந்திய அணி. அதன் பிறகு இருபது ஓவர் உலக கோப்பை, இங்கிலாந்து மற்றும் ஆஸ்திரேலிய அணிகளுக்கு எதிரான கிரிக்கெட் தொடர்களில் விளையாடவுள்ளது இந்திய அணி. இந்த நிலையில் டெல்லியில் நடைபெற்ற நிகழ்ச்சி ஒன்றில் கலந்து கொண்ட டோனி கூறுகையில், ஐ.பி.எல். போட்டிக்கு பிறகு ஒன்றரை மாத இடைவெளி இருந்ததால் முழு உடற்தகுதியோடு இருக்கிறோம். சமீபத்தில் முடிவடைந்த இலங்கைக்கு எதிராந தொடரில் கூட ஒவ்வொரு போட்டிக்கும் இடையே போதுமான இடைவெளி இருந்தது. அதனால் அடுத்து வரவுள்ள கிரிக்கெட் தொடர்களில் விளையாட நாங்கள் தயாராக இருக்கிறோம். யுவராஜின் வருகை அணிக்கும் வீரர்களின் ஓய்வறைக்கும் புதிய உற்சாகம் கொடுப்பதாக அமையும். அவர் இல்லாத போது அந்த வேலையை விராட்கோலி செய்தார் என்றார்.
