கலையுலகம் முதல் அரசியல் களம் வரை தனிமுத்திரை பதித்த சோ.ராமசாமி

சென்னை  -    கடந்த பல  மாதங்களாக உடல்நலக் குறைவால் பாதிக்கப்பட்டிருந்த பிரபல பத்திரிகையாளரும், அரசியல் விமர்சகரும், நடிகருமான 'சோ' ராமசாமி  நேற்று  அதிகாலையில் காலமானார். அவருக்கு வயது 82.

 சோ கடந்து வந்த பாதை :
சென்னை மயிலாப்பூரில் 1934-ம் ஆண்டு பிறந்த ராமசாமி பி.எஸ். உயர் நிலைப் பள்ளியில் பயின்றார். விவேகானந்தா கல்லூரியில் பி.எஸ்சி. பட்டம் பெற்றார்.   இளம் வயதில் கிரிக்கெட்டில் ஆர்வம் கொண்டிருந்தார் சோ.ராமசாமி . ஆட்ட நுணுக்கங்கள் பற்றி நன்கு அறிந்திருந்தார். பத்திரிகைகளில் விளையாட்டு விமர்சனங்களும் எழுதியுள்ளார்.

வழக்கறிஞர்  சோ .ராமசாமி :
 சோ ராமசாமியின் தாத்தா அருணாச்சல ஐயர், தந்தை ஸ்ரீனிவாச ஐயர், மாமா மாத்ரூபூதம் உள்ளிட்டோர் வழக்கறிஞர்கள். எனவே இயற்கையாகவே சோ அதில் ஈர்க்கப்பட்டு சென்னை சட்டக் கல்லூரியில் பி.எல். பட்டம் பெற்றார். உயர் நீதிமன்றத்தில் வழக்கறிஞராகப் பணியாற்றினார். பல நிறுவனங்களின் சட்ட ஆலோசகராகவும் பணியாற்றியுள்ளார்

சோ. என்று பெயர் வந்தது எப்படி ?:
 20 வயதில் ஒரு நாடகம் பார்த்தபோது நடிப்பில் ஆர்வம் பிறந்தது. முதன்முதலாக 'கல்யாணி' என்ற நாடகத்தில் நடித்தார்.
தேன்மொழியாள்' என்ற நாடகத்தில்  சோ' என்ற கதாபாத்திரத்தில் நடித்தார். பிறகு, அதுவே இவரது பெயராக நிலைத்துவிட்டது. அதன்பிறகு முழு நேர நாடகக் கலைஞராக  தனது பாதையை  மாற்றிக் கொண்டார்.
 சோவின் நாடகங்களில் அரசியல் நையாண்டியும், சமூக விமர்சனமும் கலந்திருக்கும். 1960-களில் அவரது சம்பவாமி யுகே .யுகே .என்கிற நாடகத்தை தணிக்கை செய்ய தமிழகத்தின் அப்போதைய காங்கிரஸ் ஆட்சியின் முதல்வரான பக்தவத்சலம் முயற்சி செய்தார். அது பலரது கவனத்தை ஈர்த்தது. 

சோவின் 'ஜட்ஜ்மென்ட் ரிசர்வ்டு', 'முகமது பின் துக்ளக்', 'சரஸ்வதி சபதம்' உள்ளிட்ட நாடகங்கள் நாடு முழுவதும் 1,500 முறைக்கும் மேல் மேடையேறின.  பின்னர்  'விவேகா ஃபைன் ஆர்ட்ஸ் கிளப்' என்ற நாடக நிறுவனத்தை 1954-ல் தொடங்கினார்.
 20-க்கும் மேற்பட்ட நாடகங்கள், நாவல்கள் எழுதியுள்ளார். இவரது 'இந்து மகா சமுத்திரம்' நூல் 6 தொகுதிகளாக வெளிவந்தது.
திரைப்படங்களில் நகைச்சுவை நடிகராக அடியெடுத்து வைத்தார். எம்ஜிஆர், ஜெயலலிதா, ஆர்.எஸ்.மனோகர், எஸ்.ஏ.அசோகன், எம்.என்.நம்பியார் நாகேஷ், ஆகியோர் தனது நெருங்கிய நண்பர்கள் என்று குறிப்பிட்டுள்ளார்.

பல திரைப்படங்களுக்கு கதை, திரைக்கதை எழுதியுள்ளார். 'யாருக்கும் வெட்கமில்லை', 'உண்மையே உன் விலை என்ன' உள்ளிட்ட பல திரைப்படங்களை இயக்கியுள்ளார். சோ எழுதிய பல நாடகங்கள், மேடையைத் தாண்டி திரைப்படங்களாகவும் வெற்றி பெற்றுள்ளன. இந்திய புராணங்கள், வேதங்கள், இதிகாசங்கள் உள்ளிட்டவை குறித்தும், கலாச்சாரம், மதம் குறித்தும் நன்கு கற்றவர். அவை குறித்து விரிவாக எழுதியும் உள்ளார். 

 சோவின் முகமது பின் துக்ளக் நாடகம், திரைப்படமாக உருவாவதைத் தடுக்க அப்போதைய தி.மு.க. அரசாங்கம் எவ்வளவோ முயற்சித்தும் முடியாமல் போனது.  இந்த படம் இவருக்கு பெரும் புகழைத் தேடித்தந்தது. மிக அற்புதமாக நடித்து தனது நடிப்பாற்றளை இப்படத்தின் மூலம் வெளிப்படுத்தியிருந்தார் சோ. ராமசாமி. 'நாடகம் எனது மேடைக் கூச்சத்தைப் போக்கியது. என் எழுத்தாற்றலை பட்டை தீட்டியது. ஆண்டுக்கணக்கில் தொடரும் பல நட்புகளை எனக்கு பெற்றுத் தந்துள்ளது' என்று பெருமையுடன்   அடிக்கடி கூறுவார் சோ.

துக்ளக் வார இதழ் :
தனது சொந்த உழைப்பில் 'துக்ளக்' என்ற வார இதழை 1970-ம் ஆண்டும், 'பிக்விக்' என்ற ஆங்கில இதழை 1976-ம் ஆண்டும் ஆரம்பித்து பத்திரிகையாளராகவும் முத்திரை பதித்தார்.  அவரது நையாண்டியும், துணிச்சலும் அவரது கட்டுரைகளிலும், கேலிச்சித்திரங்களிலும் பிரதிபலித்தது.  துக்ளக் ஆண்டு விழாக்களில் அவர் பேசும்  பேச்சைக் கேட்க  ஆயிரக்கணக்கான மக்கள் கூடுவார்கள் . காரணம் அவரது பேச்சில் நையாண்டியும், நகைச்சுவையும்  கடும் விமர்சனங்களும் கலந்து இருக்கும். நிறுத்தி நிதானமாக பேசுவார். ஆனால் அதில் சுவைக்கு பஞ்சமே இருக்காது.

அரசியல் அரங்கில்:
அனைத்து அரசியல் தலைவர்களுடன் நீண்டகால நட்புடன் இருந்தாலும், யாரைக் குறித்தும் விமர்சனம் செய்ய இவர் தயங்கியதே இல்லை. அதிகாரத்தில் இருப்பவர்கள், இல்லாதவர்கள், நண்பர்கள், நட்புறவு இல்லாதவர்கள் யாராக இருந்தாலும் துணிச்சலுடன் அவர்களது தவறுகளைச் சுட்டிக்காட்டுவார்.

பிரதமர் நரேந்திர மோடி உள்ளிட்ட பல அரசியல் தலைவர்களுடன் நெருங்கிய நட்பு பாராட்டியவர் சோ. தனது துக்ளக் ஆண்டுவிழா கொண்டாட்டத்தின் போது முதன் முதலில் மோடியை தமிழ்நாட்டுக்கு வரவழைத்து ஒருவகையில் தமிழகத்துக்கு அறிமுகப்படுத்தியதே சோ எனக் கூறலாம்.

 ராஜ்யசபை எம்.பி. :
 வாஜ்பாய் தலைமையிலான பாஜக ஆட்சியின்போது மாநிலங்களவை உறுப்பினராக 1999-ல் தேர்ந்தெடுக்கப்பட்டார்.  கோயங்கா விருது, நச்சிகேதஸ் விருது உள்ளிட்ட பல விருதுகளைப் பெற்றுள்ளார். பத்திரிகையாளர், நாடக ஆசிரியர், நடிகர், அரசியல் விமர்சகர், வழக்கறிஞர் என  பன்முகத் தன்மை கொண்டவர்.தமிழக அரசியல், இந்திய அரசியல் மட்டுமல்லாமல் உலக அரசியல் ஞானமும் கொண்டவர். தமிழகம் மற்றும் இந்திய அரசியலில் முக்கியத்துவம் வாய்ந்த பல மாற்றங்களுக்குக் காரணமாக இருந்துள்ளார்.   சோ தான் பணியாற்றிய துறைகளில் பெற்ற வெற்றிகள் குறித்து பெரிதாக நினைத்துக் கொண்டதில்லை. நான் அதிர்ஷ்டம் செய்தவன் என்றே கூறுவார். அதனால் தான் தனது அனுபவங்களை புத்தகமாக எழுதியபோது அதற்கு 'அதிர்ஷ்டம் தந்த அனுபவங்கள்' எனப் பெயர் வைத்தார். 

திரைப்படங்களில் சோ:
 திரையுலகிலும் கொடிகட்டி பறந்தவர் சோ. மக்கள் திலகம் எம்.ஜி.ஆருடன் எங்கள் தங்கம்,  தேடி வந்த மாப்பிள்ளை, மாட்டுக்கார வேலன், போன்ற வெற்றிப்படங்களில் நடித்துள்ளார். அதே போல் நடிகர் திலகம் சிவாஜியுடன், தங்கப்பதக்கம், கலாட்டா கல்யாணம்,  உள்ளிட்ட பல படங்களில் சோ நடித்துள்ளார். குறிப்பாக தங்கப்பதக்கம் படத்தில்  ஒரு ரூபாய்க்கு 2 கிளி என்று இவர் பேசிய வசனம் தமிழக ரசிகர்களை பெரிதும் கவர்ந்தது.  முன்னனி நடிகர்களான ரஜினிகாந்த் , ஜெய்சஙகர், ஜெமினி கணேசன் ஆகியோருடனும் பல படங்களில் நடித்துள்ளார். குறிப்பாக மறைந்த முதல்வர் ஜெயலலிதாவுடன் பல படங்களில்  நட்த்துள்ளார். அதிலும் குறிப்பாக வந்தாளே மகராசி படத்தில்  ஜெயலலிதாவுக்கு ஜோடியாக நடித்திருப்பார் சோ. இப்படத்தில் இருவரது நடிப்புமே நகைச்சுவை கலந்ததாக அமைந்திருந்தது. சுருக்கமாக சொன்னால்  கலையுலகம் முதல் அரசியல் களம் வரை  சோ தனிமுத்திரை பதித்தார் என்றால் அது மிகையாகாது.